dyrt
Aningaasarpassuit nutserinermut atorneqartartut
Quppernermik ataatsimik nutserinermut 230 koruunit: Kommunini nutsigassanik illup avataanut nassiussigaangat taamatut akeqartitsisoqarsinnaasarpoq. Aningaasartuutit amerliartuinnartut killilersimaarniarlugit sukaterisoqartussanngorpoq
Kommuneqarfik Sermersooq nutserisitsinermut ukiut tamaasa millionerpassuarnik atuisarpoq. Nutserinermut aningaasartuutit tamarmiusut ukiuni kingullerni qaffakkiartupiloorsimapput.
Kisitsisit kommunimeersut naapertorlugit 2010- mi 6,1 millioner koruunit nutserinermut atorneqarsimapput. Taakku 2011-mi 7,3 millionar koruuninut qaffapput ukiorlu kingulleq amerlanerpaaffeqarallalerlutik, aningaasartuutit tamarmiusut 10 millioner koruunit sinneqalermata.
Tamatumani ajornartorsiutit ilaat tassaavoq kommunimi sulisut sunik tamanik annerusumik minnerusumilluunniit apeqqusiinatik nutsigassanngortitsisarnerat, taamaalillunilu nutserisut assersuutigalugu »autosvar«-ip nutsernissaanut piffissamik atuisariaqartarnerat, suliassallu amerlanerpaartaasa »nukinginnartumik suliassatut« inissinneqartarnerat nalinginnaalluni.
Nutserisunik atuineq annertusiartuinnartoq kommunalbestyrelsimi Aningaasaqarnermut Ataatsimiititaliami oqaluuserineqarmat aaqqiissutissatut siunnersuutit assigiinngitsut oqaluuserineqarput.
Kommunip nutsigassatut suliassat tamarmiusut ilarpassuinik nutserisunut namminersortunut aningaasarsiakkaanut, malittarisassallu allanngortikkuminaatsut aallaavigalugit suliaqartartunut, suliassanngortitsisariaqartarnera ajornartorsiutaasorujussuuvoq. Nutserisut namminersortut assersuutigalugu quppernermut aallartinneqarsimasumut ataatsimut, imarisaa annertussusaalu apeqqutaatinnagit, 230 koruuninik akilerneqartussaapput. Tamanna tunngavippiaatigut titarnerup ataasiinnaalluunniit nutsertinnerata 230 koruuninik akeqarsinnaaneranik isumaqarpoq.
Nuummi susoqarnersoq Nuuk Ugeavisimi oqaluttuanik amerlanernik atuarsinnaavutit. Aviisi akeqanngitsumik uani pisiariguk: