Aningaasat miliuunillit aliasuuteqartunik ikiorsiisarnissamut aallarniutaassasut

Kalaallit Nunaanni inersimasut 60 procentii imminut toquttoqarneratigut annaasaqarsimapput, taamaattoqaraangallu soorunami ataasiakkaat sakkortuumik eqqugaasarput.

Innuttaasunik aliasuuteqartunik oqaloqateqartarfissaq nutaaq, aliasuuteqartut sianertarfissaat Danmarkimi Det Nationale Sorgcenterip aaqqissuussimasaa maanna atuutsinneqangajalerpoq.

Suliniut Danmarkimi siorna ukioq naalersoq aningaasanut inatsisissap isumaqatiginninniutigineqarneranut atatillugu akuerineqarsimavoq, suliniut aningaasanut inatsit aqqutigalugu ukuni marlunni 2,4 millioner koruuninik aningaasaliiffigineqassaaq. Tamatuma saniatigut Oak Foundation suliniummut immikkut 3,9 millioner koruuninik aningaasaliissuteqarsimavoq.

Sullissivimmit tusagassiorfinnut nalunaaruteqarnermi ilisimatitsissutigineqarpoq, suliniummi Kalaallit Nunaanni innuttaasut 13-ileereersimasut ilaquttaminnik ikinngutigilluakkaminnilluunniit annaasaqarsimasut sullinniarneqartut:

Arlaannik oqaloqateqarnissamik pisariaqartitsivit?

Meeqqat, inuusuttut, inersimasullu tamarmik oqaloqateqarnissamik, allaqateqarnissamilluunniit pisariaqartitsut Tusaannga attavigisinnaavaat.

Ajornartorsiutit annikikkaluarunik annertuppataluunniit siunnersuisartut ikiuinissamut piareersimapput. Kinaluunniit ajornartorsiutiminik kisimiilluni nammassissanngilaq. Tusarnaarpatsigit.

Tusaannga oqarasuaat 801180, SMS 1899 aqqutigalugit attavigineqarsinnaavoq, ammasarlunilu:
Ulluinnarni 9:00 – 22:00 (ataasinngornermiit sisamanngorneq ilanngullugu)
Sapaatip akunnerata naanerani 16:00 – 04:00 (tallimanngornermi arfininngornermilu)
Sapaammi 16:00 – 22:00

- Danmarkimi aliasuuteqartunik oqaloqateqartarnermik ukiuni arlalinni misilittagaqarpugut, misilittagarpulli Kalaallit Nunaannut nuussinnaanngilarput. Kalaallit Nunaanni aliasuuteqartunut attaveqartarfik iluatsinneqassappat, Kalaallit Illui, innuttaasut, suliamik ilisimasallit aamma isumaginninnermi peqqinnissatigullu oqartussat kalaallit aliasuuteqartarnerannik paasisimasallit oqaloqatigalugit suleqatigalugillu ineriartortitsinissaq pingaaruteqarluinnarpoq, pisortaq Preben Engelbrekt oqarpoq.

Aliasuuteqartunik oqaloqateqartarfik naapertorlugu, Kalaallit Nunaanni innuttaasut aliasuuteqarnerminni oqaloqateqartarfissaata kalaallinik namminneq annaasaqarsimasunik inuttaqartinneqarnissaa pilersaarutaavoq.

Aningaasaliissuteqarluarsimasoq Oak Foundation, nunami maani isumaginninnikkut arlatitsigut suliniuteqartartutut ilisimaneqarpoq. Aningaasaateqarfiup ilaatigut Nuummi angerlarsimaffeqanngitsut unnuisarfissaannik nutaamik sanaartortoqarnissaanut 40 millioner koruunit angullugit aningaasaliissuteqarsimavoq.

Oak Foundationimi pisortap neriuutiginerarpaa, aliasuuteqartunik oqaloqateqartarfik 'aliasuuteqarnermut pisariaqartinneqartumik upalungaarsimanissamut pingaarutilittut aallarniutaasoq':

- Ajortut naaffeqanngitsut unitsissagai

- Aliasuttarnerup oqaluuserineqarnissaa pisariaqartinneqarpoq, aamma aliasunnerup imminullu toquttarnerup akornanni ajortut naaffeqanngitsut tamatuma unitsissavai. Aliasuuteqartunik oqaloqateqartarfik taamatut oqaloqateqartarnermut tunngaviliissaaq, Kalaallillu Nunaanni aliasuuteqartarnerup paqumigineqartarnerpassuisa unitsinneqarnissaanut tapertaassalluni, Oak Foundation Denmarkimi pisortaq Esther Nørregård-Nielsen oqarpoq.

Aliasuuteqartunik oqaloqateqartarfik folketingimi ilaasortap Aaja Chemnitz Larsenip (IA) salliutitaasa pingaarnerit ilagisimavaat, taassumalu suliassap aallartinneqarnera nuannaarutigaa:

- Det Nationale Sorgcenter pineqartumut atatillugu misilittagaqarluarpoq, taamaammallu nuannaarutigaara, Kalaallit Nunaanni inuit najugaqartut suleqatigalugit neqeroorutip inerisarneqarnissaata aallartinneqarnera, taanna oqarpoq.

Aliasuuteqartunik oqaloqateqartarfik 2022-p ingerlanerani atuutsinneqalissasoq naatsorsuutigineqarpoq.