Aningaasatigut peqquserluutinik malunnarunnaarsaaneq pinerluttunut ajornarnerulissaaq
2025-mi maajimiit aningaasaq 1000 koruuni atorunnaarsinneqarpat, aningaasatigut peqquserluutinik malunnarunnaarsaaneq aamma aningaasanik tigummianik nuussisarneq pinerluttuliortunut ajornarnerulissaaq.
- Aningaasap 1.000 koruunip atorunnaarsikkiartuaarneratigut aningaasanik tigummianik annertuumik nuussisarneq pinerluttuliortunut ajornarnerulissaaq, taamatullu aamma aningaasat tigummiat toqqornissaat assartornissaallu ajornarnerulissalluni. Paasisaanissamut aarlerinaammik annertusisitsissaaq, pinerluttuliortullu maannamut sapiisernerusariaqarnerinik malitseqassalluni," National enhed for Særlig Kriminalitetimi (NSK) (Nuna Tamakkerlugu Pinerlunniarnernik immikkuullarissunik paasiniaasartoqarfimmi) politiit pisortaat, Lasse Boje, oqarpoq.
Aningaasap 1.000 koruunip atorunnaarsikkiartuaarneratiguinnaq aningaasatigut peqquserluutinik malunnarunnaarsaanerit pinngitsoortinneqarsinnaanngillat, aningaasanik 500 koruuninik, nioqqutinik naleqarluartunik, guldinik, nunat allat aningaasaataannik imaluunniit aningaasanik paasiuminaallisakkanik pinerluttuliortut taarsiullugu qinigassatut allatut atuisinnaammata, NSK tusagassiuutinut nalunaarummi allappoq.
- Aningaasatigut pinerluttuliornerit, ilaatigut aningaasatigut peqquserluutinik malunnarunnaarsaanerit aammalu peqquserluuteqarnerit ineriartornerinut immikkut eqqummaariffiginninnissamik aningaasap 1.000 koruunip atorunnaarsikkiartuaarnera pissutissaqartitsivoq.
Innuttaasunut mianersoqqussut
- Tassunga atatillugu aningaasatigut peqquserluutinik malunnarunnaarsaanianut innuttaasut iluaqutigineqarnaveersaaqqullugit NSK-miit mianersoqqorusuppavut. Pinerluttuliortut aningaasanik tigummiarpassuallit allanik kontomut nuussisinnaasunik ujaasissapput, kingornalu akiillutik nuusseqqusillutik. Pinerluttuliortulli sinnerlugit ikisigaanni aggortitsilluniluunniit, aningaasatigut peqquserluutinik malunnarunnaarsaasutut eqqartuussaasoqarsinnaavoq, NSK mianersoqquserpalaartumik oqarpoq.
- Eqqummaarigit allallu 1.000 koruuniutiminnik akiliiniarsarippata itigartikkit - qanorluunniit oqaluttuaraluarpata takornartap akiliutaa ajormat taamaattumillu aningaasat ikisinnaanngimmagit, imaluunniit aallaliivikkami aningaasallu ikiartornissaat angumerisinnaannginnamiuk, Lasse Boje siunnersuilluni oqarpoq.