Aningaasatigut peqquserluutinik malunnarunnaarsaanermut inatsit Folketingimi suliaripallanneqartoq
Inatsisissatut siunnersuutip Kalaallit Nunaanni aningaasatigut peqquserluutinik malunnarunnaarsaanermut aamma peqqarniisaarniarnermut aningaasaliinermut suliniutit nukittorsarpai. Kalaallit Nunaata aamma Danmarkip akornanni aningaasanik nuussisoqarsinnaanissaanut inatsit pisariaqartinneqarpoq.
Danmarkimi aamma EU-p sinnerani nunat akornanni aningaasarpassuarnik nuussinissamut malittarisassat sukannersuupput. Malittarisassat taakku tulluarsarlugit Kalaallit Nunaanni aamma atuutilissapput.
Inatsit tamatuminnga qulakkeerinnittussaq ullumi Folketingimi suliaripallanneqarpoq.
- Kalaallit Nunaanni paasissutissanut peqqussutip aningaasanik nuussinermi ilanngullugu nassiunneqartarnissaa inatsisissatut siunnersuutip siunertaraa (2. aningaasanik nuussinermi peqqussut), taamaalillunilu inatsisit Danmarkimi atuuttut Kalaallit Nunaanni atuutilernissaat qulakkeerneqassalluni, inuussutissarsiornermut ministerip Rasmus Jarlovip saqqummiussinerani tamanna oqaatigineqarpoq.
- Kalaallit Nunaanni aningaasatigut peqquserluutinik malunnarunnaarsaanermut aamma peqquserlunnermut aningaasalersuinermut akiunermi suliniutit aalajangersakkat nukittorsassavaat.
Aningaasarpassuarnik nuussigaanni tigusisussaq pillugu paasissutissanik nassiussisoqartalernissaanik tamanna isumaqarpoq.
Nutaamik inatsisiliortoqanngippat nuussinerit inerteqqutaalissapput
aningaasatigut peqquserluutinik malunnarunnaarsaanerup aamma peqquserluttunik aningaasalersuinerup pinngitsoortsinniarnerisa saniatigut, Kalaallit Nunaata aamma Danmarkip imaluunniit EU-p akornanni aningaasanik nuussisoqarsinnaaneranut inatsit piumasaqaataavoq. Tamannalu suliaripallanneqarneranut aamma tunuliaqutaavoq, tusarniaanermut killiliunneqartartut nalinginnaasut malinneqaratik.
- Inissinnissaanut tuavilaarnerput ilumoorpoq. Kalaallit Nunaata aamma Danmarkip aamma Savalimmiut aamma Danmarkip kiisalu Kalaallit Nunaata Savalimmiullu akornanni EU-p sinneranilu annertuumik ajornartorsiutaasussaammat, Rasmus Jarlov naggataatigut oqaaseqaatimini taama oqarpoq.
- Kisianni inissipallassinnaarpasipparput, taamaalilluta annertuumik unammillernartoqartitsissanngilagut.
Aaja Chemnitz Larsen (IA) Nuummit Københavniliapallappoq, siunnersuutip suliarineqarneranut peqataajartorluni.
- Oqallinnermut tassunga peqataanissarput pingaartissimavarput, taamaalilluni nunatsinnit oqallinnermut peqataasoqarniassammat.
Aleqa Hammond (NQ) taassuma suliarineqarneranut peqataanngilaq.
Folketingimut ilaasortat akerliusoqanngitsumik siunnersuutit Kalaallit Nunaat pillugu ataatsimiititaliamut aamma Savalimmiullu pillugit ataatsimiititaliamut ingerlateqqippaat.