Narsaq
Annemad savaararlu
TV-kkut iganermik takutitsisartoq Anne Hjernøe Narsami paasisassarsiortoq
TV-kkut igasartutut ilisimaneqartoq Anne Hjernøe imaluunniit Annemadimik aamma nalunnginneqartoq sapaammi Narsamiippoq.
Neqi, Inuili kiisalu Narsap Iluani nersutaatilik Sofus Frederiksen takusarpai.
Qanoq kalaallit nerisassiaat sananeqartarnersut takusarlugit Anne Hjernøe oqarpoq.
DR-ikkut arlaannik TV-kkut aallakaatitassiulernersoq aperineqarami apeqqummut naaggaarpoq. Taanna siunertaanngitsoq oqaatigaa.
Qaqortoq Hotelimi sammisaqartitsinermi aaqqissueqataalluni oqarpoq, tassani hotelimi igasut peqatigalugit sammisaqarsimalluni oqarpoq. Taanna ilutigalugu Narsamukarnissaminut periarfissinneqarami illoqarfimmut alakaalluni oqarluni.
Neqimut pulaarami sulisumit Per Plougimit takornariartinneqarpoq, Neqimilu misilinneqarsinnaasut aamma misilillugit.
Inuilimi nerivoq, tassani nannup neqaa, nersussuup umimmaallu neqaanik aamma nerilluni. Sofus Frederiksen nulialu Suka Narsap Iluani nersutaateqartut pulaarpaattaaq, tassani savaaqqat takuneqarlutik. Anne Hjernøep paniata Camillep savaaqqat ilaat paarigamiuk nuannaaqaaq.
Ualilluarnerani Qaqortumut uteqqipput.