Annette Heick ikiuukkusuppoq
Aliikkusersuisartoq Annette Heick Dansk Folkehjælpip ambassadøriinut, ilaatigut kalaallit meerartaannik atugarliortunik ikiuuttunut, ilannguppoq.
Dansk Folkehjælp-imi ambassadøritut kalaallit meerartaat isumaginninnikkut atugarliortut sullisissvai, Dansk Folkehjælp-imut piumassutsiminnik ilaasortanik pissarsiortassalluni aammalu atuarfinni ingerlatsivinnilu ikiueqqaarnermik pikkorissartitsisassalluni, Jyllandsposten allappoq.
Annette Heickip angajoqqaarai Kjeld aamma Hilda Heick ilaatigullu tv-kut aallakaatitassiani arlalinni aqutsisuusarsimalluni assersuutigalugu "Roomservice"-mi, aammalu "Vild med dans"-imi qitissimalluni.
Dansk Folkehjælp-imit tusagassiorfinnut nalunaarut malillugu Annette Heickip pingaartumik meeqqat atugarliortut inuunerisa pitsaanerulersinnissaat nuannernerulersinnissaallu sulissutigerusuppaa.
- Uummatikkut attortittarpunga tusaraangakku kalaallit meerartaat meeqqatut allatulli feriarsinnaanngitsut, akissaqanngimmat, Annette Heick oqarpoq, taamaattumillu 1 million koruuninik katersuiniarpoq meeqqat feriartinniarlugit.