Anorersuarnera mittarfiliortoqarneralu timmisartuussinermut akornusiisimasut
Nuummi mittarfimmi isumannaallisaanermut immikkoortumi assaasoqarsimanera pissutigalugu anorlernerani timmisartut aallarsinnaanerat missinnaanerallu killeqarnerusimavoq. Anorersuarneralu aamma pissutaalluni angalasussat hunnorujulikkuutaat unnuisinneqartariaqarsimapput.
Nuummi Maniitsumilu sisamanngornermi anorersuarnerani timmisartuussinissat arlallit taamaatiinnarneqartariaqarsimapput.
Taamaatitsinerit kingunerisaannik Kangerlussuarmi unnuisariaqalersut 332-usimasut Air Greenland Sermitsiaq.AG-mut ilisimatitsivoq. Kangerlussuarmiit Maniitsumut Nuummullu angalasinnaajunnaartut taama amerlatigimmata, Danmarkimiit Nuummut Maniitsumullu sisamanngornermi angalasussat 219-it aamma taamaatinneqaannartariaqarsimapput. Taamaaliortoqarpoq Kangerlussuarmi unnuiffissaaruttut amerlavallaalinnginnissaat pillugu, Air Greenland ilisimatitsivoq.
- Angalasussat 332-it Kangerlussuarmiit ippassaq ingerlariaqqissinnaasimanngillat. Danmarkimiillu Nuummut Maniitsumullu angalasussat 219-it ullumi angalanissaat taamaatissallugu aamma aalajangersimavugut, Air Greenland ilisimatitsivoq.
Angalasussat 219-it Kangerlussuarmi unnuiffissaaruttooratarsinnaanerat pinngitsoortinniarlugu taamaaliortoqartoq, Air Greenlandimi attaveqatigiinnermik pisortaaneq ilisimatitsivoq.
- Upperaarput angalasussanut pitsaanerpaasoq Københavnimiitiinnarnissaat, unnuiffissaqarnissaq eqqarsaatigalugu. Naatsorsuutigaarput Imarpik qulaallugu timmisartuussisinnaasunik sapaatiuppat ataasinngorpallu attartorsinnaassalluta, aqagu arfininngornermi attartornitta saniatigut, Air Greenlandimi CCO, Henrik Søe Sermitsiaq.AG-mut oqarpoq.
Isumannaallisaanermut immikkoortortaq assaavigineqarsimasoq
Air Greenland Facebookimini ilisimatitsivoq sisamanngornermi unammillernartut ilagisimagaat Nuummi mittarfimmi isumannaallisaanermut immikkoortup ilaa mittarfiliortoqarnerani assaavigineqarsimammat.
- Kalaallit Airports mittarfiliorpoq ullumilu sanaartorneq pissutigalugu timmisartut Nuummi qangattalernermi milernermilu sinaaniit anorip qanoq sakkortutigisinnaaneranik Trafikstyrelsen immikkut malittarisassiorpoq. Tamanna mittarfimmi isumannaallisaanermut immikkoortumi assaasoqarsimaneranik pissuteqarpoq, tamannalu minnissamut qangattarnissamullu atugassarititaasunik ullumi killiliisimalluni, Air Greenland nassuiaavoq.
Timersortarfimmi unnuisimasut
Air Greenland ilisimatitsivoq immikkoortoq assaavigineqarsimasoq maanna matuneqarsimasoq, anoraasuartaraluartorlu mittarfik maanna atorsinnaanerulertoq.
Nuummi Maniitsumilu silap unammillertitsinera pissutigalugu angalasussat 332-t Kangerlussuarmi unnuisariaqalersimapput. Kangerlussuarmi unnuisussat ilaat inissaqanngimmata Kangerlussuup timersortarfia unnuiffissatut aaqqiissuunneqarsimavoq. Tamanna Mittarfeqarfiit Qeqqata Kommunialu suleqatigalugit naammassineqarsinnaasimavoq.
Nuuk suli anorsaaraluartoq timmisartuussinerit maanna aallartisaqqilerput.