lomvie-krise
Appanniarneq sivitsussanngilaq
Avannaani appanniarnerup sivitsornissaa pillugu Atassutip siunnersuutaa Inatsisartuni amerlanerussuteqartut ilalinngilaat
Avannaani appanniarneq sivitsussanngilaq. Akerliannilli appat illersugaanerisa sukaternissaa piareersarneqarpoq. Atassut siunnersuuteqaraluarpoq appanniarnerup sivitsorneqarnissaanik.
Atuaruk: Appat eqqissisitaalluinnarnissaat biologit inassutigaat
Atassut sinnerlugu siunnersuuteqartut tassaapput Gerhardt Petersen aamma Siverth K. Heilmann Kangaatsiamiit Qaanaaq tikillugu appanniarnerup sivitsorneqarnissaanik siunnersuuteqartut. Taakku siunnersuutigaat appanniarneq ullumikkut malittarisassat malillugit februarimi unittartoq maajip qeqqani aatsaat unittalissasoq.
Atuaruk: Ilisimatuut: Taamaattumik appat nungulerput
Piniartut ilisimasaqarnerupput
Naalakkersuisulli Inatsisartunilu amerlanerussuteqartut siunnersuut itigartippaat Pinngortitaleriffimmit inassuteqaat kingulleq innersuussutigalugu. Ilisimatuut isumaqarput appat ulorianartorsiortitaasut siunnersuutigalugulu ukiuni qulini eqqissisimatinneqassasut.
Atuaruk: Arktisk Råd appanut aamma ernumavoq
Naalakkersuisut maanna suleqatigiissitamik pilersitsipput timmissat pillugit nalunaarutip allannguutissaanik siunnersuuteqartussanik. Allannguutissami anguniarneqarpoq appat illersugaanerisa sukaterneqarnissaa, piniarnermut aalisarnermullu naalakkersuisoq Karl Lyberth siunnersuummut akissuteqarluni oqarpoq.
Atuaruk: Eqqissititsinissaq KNAPKp akerleraa
Siunnersuutip itigartinneqarnera Siumup, Inuit Ataqatigiit aamma Demokraatit ilalerpaat. Siunnersuummik tapersiissut tassaapput Atassut aamma Partii Inuit.
- Tunngaviusumik Partii Inuit isumaqarpugut isumaqartuassallutalu nunami maani piniartoq piniakkaminik qaffasinnerpaamik ilisimasaqartuusoq, taamaattumillu oqaluttuunneqartariaqanngittoq suut qaqugu piniassanerai imaluunniit piniassannginnerai, Partii Inuit sinnerlugit Inatsisartuni ilaasortaq Randi Broberg siunnersuutip siullermeerneqarnerani oqarpoq.
Inatsisartut piniarnermut aalisarnermullu ataatsimiititaliaat isumaliutissiissumminik marlunngornermi saqqummiussivoq ataatsimiititaliarlu isumaqatigiissoq inassuteqarpoq siunnersuut itigartinneqassasoq.