Aputip sisoornerani ajutoorneq pillugu politiit tusagassiortunik katersortitsinerat
Marlunngormat ualikkut angutit inuusuttut marluk qamuteralannik angalasut aputip sisoorneranit matoorussaammata annaassiniartoqarpoq.
Marlunngormat alianartumik pisoqarpoq. Angutit marluk 22-nik ukiullit qamuteralannik angalasut apummik sisoortoqarnerani ajutoorput.
Ajutoornerup malitsigisaanik politiit, Issittumi Sakkutooqarfik aamma qamuteralaat peqatigiiffianit Qamutimit nammineq kajumissutsiminnik ikiuuttut annaassiniarnermik annertuumik ingerlatsipput.
Kalaallit Nunaanni Politiit pingasunngornermi ullup-qeqqanut iliuuseqarneq annertooq pillugu tusagassiortunik katersortitsipput. Upalungaarsimanermut pisortaq Brian Thomsen oqaluttuarpoq ajutoornermik nalunaarut politiinut marlunngornermi nal. 17.20 annguttoq.
Oqarpoq ajutoortoqarnerani inuit qulit sinnerlugit ilaasimasut, taakkualu marluk naleqquttunik isumannaallisaanermut atortussaqarluaraluarlutik annaanneqarnissaannut naammassimanngillat.
Inuunermut takussutissaqanngilaq
Ajutoornerup kingorna nalunaaquttap akunnera ataaseq aputaajaasoqareersoq angut siulleq nassaarineqarpoq, aappaalu nalunaaquttap akunnera ataaseq ingerlaqqereersorlu nassaarineqarluni.
Brian Thomsen oqaluttuarpoq taakku marluk qulimiguulimmik napparsimmaviliaanneqaramik ikiorneqaqqaartut, nassaarineqaramilli inuunerminnik takussutissaqanngillat.
Brian Thomsenip erseqqissarpaa Aqqitsoq sivingasorujussuullunilu ulorianartorujussuusoq, aputip sisoornerani aputerujussuaq sisoorsimammat.
Annaassiniartoqarnerani ikiuussimasut amerlasuut eqqarsaatigalugit kommunip ajornartorsiornermut upalungaarsimaffia ammatinneqarpoq, taamaalilluni tarnip pissusaanik ilisimasalimmik oqaloqateqarnissamut periarfissaqarpoq. Brian Thomsen oqarpoq oqarasuaammut 367000-imut sianerluni, upalungaarsimanermi oqaloqatigineqarsinnaasunut innersuunneqarumasoqarsinnaasoq.
Pissusissamisoortumik suleqatigiittoqarpoq
Annaassiniarnermi peqataasut ilagaat Sermersuumi upalungaarsimasunit qatserisartut 14-it, annaassiniarnerlu kinguneqarpoq, upalungaarsimasunit Jes Damgaard Andersen oqaluttuarpoq:
- Inuusuttut taakku annaanniarlugit iliuuseqangaatsiartoqarpoq.
- Pisoq ilungersunartorujussuuvoq uatsinnullu sunniuteqartarluni, oqarpoq.
Jes Damgaard Andersenip erseqqissarpaa annaassiniaaneq politiinit aqunneqarmat annaassiniaaneq pillugu sukumiisumik oqaaseqarsinnaanani, kisiannili oqartussaasut peqataasut namminnerlu kajumissutsiminnik ikiuuttut akornanni suleqatigiinneq pissusissamisoorluinnartoq oqaatigaa.
Kajumissutsiminnik ikiuuttut qamuteralaat peqatigiiffiata qutsavigai
Qamuteralaat peqatigiiffiata Qamutip Facebookimi quppernermini pingasunngormat ullaap tungaani ilaasortat ajunaarnermut atatillugu iliuuserisimasaat qujassuteqarfigai:
-Snescooterit 30–40-t missaat, atugassarititaasut naapertorlugit sapinngisartik tamaat ujaasinermi ikiuupput. Ajunaartut nanineqarput ilaqutaannullu apuunneqarlutik.
Qamutini ilaasortat aammalu SAR-imut ikiuuttut tamaasa qutsavigingaarpavut.
Ajunaarneq alianaqaaq, ilaqutaasullu eqqarsaatitsinniipput qamanngavillu misiginneqatigingaarpavut.
Naalakkersuisut siulittaasuat Múte B. Egede aamma ajunaarneq pillugu nittartakkatigut attaveqaqatigiittarfikkut ima oqaaseqarpoq:
-Nuummi alianaqisumik inuusuttunnguit marluk ajunaarneranni ilaqutaasut qanigisaasullu misiginneqatigingaarpakka, Múte B. Egede Facebookimi allappoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...