Aputip sisoorneranit ajutoorneq: Angutit inuusuttut marluk ajunaarput
Aputip sisoorneranit qamuteralattartut marluk apummut matoorussaapput. Angutit inuusuttut marluk ajunaarsimasut, politiit marlunngornermi unnukkut nalunaarutigaat.
Angutit inuusuttut marluk, tamarmik 22-nik ukiullit, Nuup ungasinngisaani Aqqitsumi toqungasut nassaarineqarput.
Marlunngornermi ualilluinnartoq aputip sisooreerneranit annaassiniaanerup ingerlanneqarnerata kingorna, politiit taama nangittumik nalunaaruteqarput.
- Ikiueqqaarneq sumiiffimmi pigaluarpoq, inuilli inuuneri annanneqarsinnaasimanngillat. Inuit marluk kinaassusersineqarput, ilaqutaasullu kallerinneqareerput, politiit ilisimatitsipput.
Annaassiniaaqataasut arlallit
Nuummi eqqaanilu ulluni kingullerni annertuumik nittaappoq, aputip sisoornissaa annertuumik aarlerinaateqalerluni. Politiit mianersoqqusillutik ippassaq nalunaaruteqarput, qamuteralammik ingerlaartut mianersoqqullugit.
Ullumi annaassiniaanermi politiit, qatserisartut, Arktisk Kommando, qamuteralannik annaassiniaanerni upalungaarsimasut, peqqinnissaqarfik innuttaasullu ujaaseqataapput.
- Nuummi qatserisarfimmi ikiuigasuarnissamut upalungaarsimasut, pisumik oqaloqateqarusuttut psykologimik oqaloqateqarusuttut orningussinnaapput, politiit ilisimatitsipput.
Annaassiniaanermi ikiuuttorpassuarnut politiit qujaniuteqarput.
Politiit ilisimatitsipput allanik maqaasisaqartoqanngitsoq, ujaasinerlu naammassineqartoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...