Aqqalu A.: Ajoqaaq

p>Illuatungiliuttut marlunngornermi Aqqalu Abelsenimut Atassummeersumut tatiginninnginnermik taasititsinissaq siullersuutigaat, MIPImut tunngatillugu (Meeqqat inuusuttullu pillugit qitiusumik Ilisimasaqarfik) aamma Utoqqaat illuini utoqqarnullu inissiivinni nakorsaasissarnerit pillugit "paasissutissanik pingaarutilinnik Inatsisartunut saqqummiussinaveersaarsimasutut". Peqqissutsimut naalakkersuisuusimasunngortoq aamma "DIHmi pissutsit ilungersunarluinnartut"-nut atatillugu Peqqissutsimut atatsimiitsitaliap allakkatigut saaffiginnissutaanut akinaveersaarsimasutut isornartorsiorneqarpoq.

Aqqalu Abelsenip tatiginninnginneq inatsisartuni amerlanerussuteqartussanngortoq misigalugu tunuarnissani aalajangiuppaa, nassuiaavoq.

– Tunngavigineqartut pingasuusut taakku tunuartariaqaolernissanut ilungersunartooreersut misigisimannginnakku?

– Taamak isumaqanngilanga, Aqqalu Abelsen sermitsiaq.glimut toqarpoq.

Naalakkersuisunut ilaasortaasimasunngortup assersuutigalugu oqaatigaa, nammineq utoqqaat nakorsaasersorneqartarnerat pilugu inatsisissatut siunnersuummut atatillugu pissutsit pillugit misissuitsilluni aallartissimalluni. Peqatigitilluguli nassuerutigaa misissuinerup inernera pillugu nassuiaatinik nutaanik takkuttoqartussaasoq partiit tamaasa ataatsimiitsitaliarlu ilisimatissimasussaagaluarini.

– Qanoq igaajuk, pissutsit illit nammineq taamak ilungersunartiginngitsutut oqatigisatit pillugit tunuartariaqarnerit??

– Oqaatigisariaqarpara uggornartuusoq, kisianni politikki taamaappoq, aammami inatsisartut naliliisussaagamik, tamannalu tusaatissatut tiguara.

– Naalakkersuisooqatigiinnit pilliutigineqartutut misigisimavit?

– Naliliinerat ataqqisariaqarpara, taavalu pitsaanerusumik naalakkersuisunut ilaasortassamik pitsaanerusumik nassaarnissaat neriuutigiinnassavara.

– Naalakkersuisutut tunuartuni kisartaanngilatit. Ingerlatsiviit taakku marluusut Ilaqutariinneq Peqqinnerlu naalakkersuisunut ilaasortamut ataasiinnarmut angivallaarsimanerpat?

– Peqqinneq Avatangiisillu siusinnerusukkut tigumminikuuakka, taakkulu ingerlalluarsimallugit isumaqarpunga. Ingerlatsiviit angisoorujussuupput, taamatullu isigalugu sulisorisat pitsaasut ulluinnarni ikiuulluarsinnaasut pinngitsoorneqarsinnaanngillat. Inuup ataasiinnaap inerlatsiviit angisuut marluk iluanni pisut ataasiakkaat tamaasa pillugit ilisimasaqarnissaq saperpaa.

– Maanna naalakkersuisoqarfigisimasanngortumi sulisut qanoq nalilerusuppigit?

– Taakku uattulli sapinngisartik atorlugu sulisimassasut naatsorsuutigaara, aamma neriuutigaara naalakkersuisoqarfik sutigut nukittunerulersinnaanerlugu nalilersuiffigissagaat, kingoraartissara taamatut misigisaqarsinnaannginniassammat, Aqqalu Abelsen oqarpoq.