Aqqalu C. Jerimiassen (A): Kommunit katitigaanerat pillugu aalajangiiffigisassatut siunnersuuteqarniarpoq
Kommunit kattussuutsinneqarnerisa nalilersoqqinneqarnissaannik siunnersuuteqareerluni maanna kattussuussisimanerup allanngortinneqarnissaanik siunnersuusiorpoq.
- Naalakkersuisut sivisoorujussuarmik nalunngereerpaat kommmunit kattussuutsinneqarnerat sanngeequteqarpallaartoq, aammalu kattussuussinermi angusassatut naatsorsuutigineqarsimasut pinngitsoornikuusut. Kiisami nassuertoqarpoq, tamannali sumut iluaqutaassava, kattussuussinerup kingorna ajornartorsiutit pinngorsimasut uniinnarlutik isigiinnarunikku?
Taamak aperivoq Inatsisartuni ilaasortaq Atassutillu siulittaasua Aqqalu C. Jerimiassen innersuussutigalugu nunamut namminermut naalakkersoq, Jess Svane (S), qanittumi ammasumik nassuermat, kommunit kattussuutsinneqarneranni angusassatut naatsorsuutigisat pinngitsoorsimasut, taannalu nangippoq:
- Sooruna Naalakkersuisut taamak iliuuseqarumaataartigisut? Sooruna utaqqisutut inissisimaannartartut Inatsisartuni ilaasortat iliuuseqaqqusinissaat utaqqerusaaginnartarlugu? Isumaqarpunga akisussaaffimmik qimarratiginninnerusoq Inatsisartut patsissiullugit iliuuseqarnaveersaartarneq.
Naammagisimaarinninnermik misissuineq, taavami kingorna susoqassava?
Kommunit kattussuutsinneqarsimanerat pillugu nalilersuisoqassasoq Aqqalu C. Jerimiassen Inatsisartut 2022-mi ukiakkut ataatsimiinneranni siunnersuuteqarnikuuvoq (UKA2022/93). Taamaaliornikkut angorusunnikuuaa kommunit kattussuunneqarnerisa kingorna qanoq pisoqarsimanersoq paasissutissanik saqqummiussisoqassasoq:
- Pingaaruteqarpoq pissutsit qanoq innerinik piviusut tunngavigalugit isummersorsinnaanissarput, pingaartumik aaqqissuussaanerit atuuttut kingusinnerusukkut allanngortissagutsigit piviusut sorpiaanersut nalunagit allanngortiterisinnaassagutta, taamaammat angorusunnikuugaluarpara nalilersuineq sukumiisoq suliarineqassasoq. Pissutsilli qanoq ippiarnerinik qaqilerinissaq pinnagu, siunnersuutiga sangutinneqarpoq innuttaasut naammagisimaarinninnerannik misissuinissanngortillugu. Ajunngilluinnarpoq innuttaasut tusarniaavigineqartarnerat, ajornartorsiutilli piviusut kinguarsaruusaarneqarnerannik aamma kinguneqarsinnaapput, pingaartumik siumungaaq nalunngereerlugu ajornartorsiuteqartoq aaqqinniagassanik.
Taamaammat Aqqalu C. Jerimiassen (A) naammagisimaarinninngilaq Naalakkersuisut ajornartorsiutaasut aaqqinniarnagit paamaarusserusaarnerattut nalilikkani pillugu, taassumami takorusukkaluarpaa ajornartorsiutit aaqqinnissaannut siunnersuutinik tigussaasunik oqallisiginninnissaq aammalu minnerunngitsumik innuttaasorpassuit qanimut oqartussaaqataanerup peerneqarsimaneranik naammagittaalliuuteqartut minnerunngitsumillu kommunip ataatsip iluani sumiiffiit ilaasa siuarsarneqarnerunerannik misigisimaneq isummani malillugu aaqqiiviginiagassaammata:
- Taamaammat Naalakkersuisunit erseqqissuliortoqarnissaa amigaatigivara, sumununa naammagisimaarinninnermut misissuineq atorniaraat? Misissuinerup kingorna susoqassava? Suli qanoq sivisutigisumik Naalakkersuisut ajornartorsiutit iliuuseqarfiginaveersaassavaat qagululuuna paasilerniaraat ajornartorsiutit pineqartut kinguarsagassaanngitsumik aaqqiiviginiarneqartariaqartut?
Aalajangiiffigisassatut siunnersuummik saqqummiussissamaarpoq
Aqqalu C. Jerimiassen apeqquteqaat aallaavigalugu oqallisissianik aammalu aalajangiiffigisassatut siunnersuutinik Inatsisartutigut qaqitsisarpoq iliuuseqarnissamut sakkussanik peqarnissaq angorusullugu, maannalu misileeqqissamaarpoq:
- Naalakkersuisut iliuuseqarumanngitsutut pissusilersuinnarput, taava misilittariaqarparput iliuuseqarnissaannik oqqerlugit. Taamaammat upernaaru Inatsisartut ataatsimiinnissaanut aalajangiiffigisassatut siunnersuummik saqqummiussissaanga, tassanilu kommunit kattussuutsinneqarsimanerisa kingorna ajornartorsiutit pinngorsimasut iliuuseqarfiginissaannut avaqqutassaanngitsut qaqilerneqassasut neriuutigivara, taamaaliornikkut tamatta peqatigiiffigisinnaasatsinnik nassaaqatigiinnissarput neriuutiginerpaavara, aamma neriuutigivara kattussuutsitsisimaneq iluatsinngitsoorsimasoq atorunnaarsillugu allatut aaqqissuusinissarput angusinnaassallugu, Aqqalu C. Jerimiassen (A) Sermitsiaq.AG-mut oqarpoq.