Aqqaluaq: Lars-Emilip immikkut pineqarnera ajuippoq

Inuit Ataqatigiit sinnerlugit Inatsisartuni ilaasortap Aqqaluaq B. Egedep Demokraatit siulittaasuat Jens B. Frederiksen assigalugu isornartorsiorpaa Inatsisartut siulittaasuata Lars-Emil Johansenip Siumumeersup nakorsiarnermini immikkut pineqarnera. Lars-Emil Johansen nakorsamut ingerlaannaq nakorsiarpoq isimigut aseruuttoornermini peqqissutsimut naalakkersuisumut Steen Lyngemut Atassumeersumut sianerami.

Lars-Emil Johansen sapaatip akunnerata naanerani isimigut aseruuttoorpoq, KNR-ilu malillugu nakorsamit suliarineqarasuarpoq peqqissutsimut naalakkersuisoq Steen Lynge Atassummeersoq attavigigamiuk.

Pissaanermik atornerluineq
Immikkut pineqarneq illuatungiliuttut mamaagaat. Demokraatit siulittaasuat Jens B. Frederiksen isumaqarpoq innuttaasunik suusupaginninnerusoq Aqqaluaq B. Egedelu isumaqarluni pissaanermik atornerluinerusoq.

- Inuppassuaqarpoq nakorsiarnissamut piffissami sivisuumi utaqqisartunik Lars-Emil Johansenip isiminik aseruuttoorneranit ajornerujummik nappaateqaraluarlutik. Taamaammat akuersaaruminaappoq Lars-Emil Johansenip immikkut pineqarnera, Aqqaluaq B. Egede oqarpoq.

Politikki samminiartigu
Taanna isumaqarpoq Lars-Emil Johansenip nakorsiarnerani Lars-Emil Johansenip Steen Lyngellu pissaanermik aqutsinerat isornartoqartoq.

- Pitsaasuunngilaq isumaqaraanni Inatsisartuni siulittaasunngorami immikkut pineqartariaqarluni. Tamanna qanga naalakkersuinikkut pissutsinut tassalu politikkerit innuttaasunit imminnut salliutinnerannut eqqaanartoq, Aqqaluaq B. Egede oqarpoq.

Inuit Ataqatigiit siulittaasuata Kuupik Kleistip Lars-Emil Johansenip nakorsiarsimanera toqqaannartumik oqaaseqarfigerusunngilaa.

- Qinersinerup kingorna inunnut ataasiakkaanut tunngasut piffissarujussuaq atorlugu oqallisigineqarput. Politikkimut tunngasut oqallisigerusunneruakka inunnut ataasiakkaanut tunngasut pinnagit, IAp siulittaasua Kuupik Kleist oqarpoq.