Aqqaluk Ittumi sapiitsut

Arfininngornermi 1. september nunaqarfiliartaatip Aqqaluk Ittup Qaqortumilu tulattarfiup akornanni inummik imarmut nakkartoqarpoq. Inuk annanniarluni nammineerluni qaqisinnaasimanngilaq. Søren Mikaelsen aamma Lars Andersen sukkasuumik qisuariarsimanngitsuuppata suleqataata inuunini annaasimassagaluarpaa.

Søren Mikaelsen:

- Innareerlunga tassanngaannaq eqqumiitsumik kasuttortoqarpaluttoq tusaalerpara. Isumaqarlunga umiarsuup qaavaniit nipi tusaallugu. Majuarpunga sunaanersoq alakkarlugu. Suaartarpunga ”hallooo”, kisianni qisuariartoqanngilaq. Tassanngaannarlu ataaniit akisoqarpoq.

Søren Mikaelsen-ip paasilerpaa suleqatini imarmut nakkarsimasoq. Imaaniippoq umiarsuarmullu kasuttorluni nipiliortitsilluni pisoqarneranik ilisimatitsiniarsaraluni.

- Tuaviinnaq ammukarfigaara qaqinniarsarilerlugulu, kisianni oqimaappallaarpoq. Assakaasumik nikorfaffigisinnaasaanik ningitsigaluarpunga, kisianni nukeqannginnami atorsinnaanngilaa. Uteqqikkiarlunga qilerummik aallerpunga taassuminngalu timaa kaajallallugu qilerlugu morsunnginniassammat. Paasilerpara uanga nammineerlunga iliuuseqaqqissinnaajunnaarlunga, allamillu ikiorteqartariaqarlunga.

Unnuakkut nalunaaqutaq 04.20-nngortoq Søren Mikaelsenip mobilini pissarsiareriarlugu umiarsuup naalagaa Lars Andersen sianerfigaa.

Minutsit arlalialunnguit qaangiummata Lars Andersen tikiuppoq, marluullutillu suleqatertik imaaniit qaqinnialerpaat.

Politiit qatserisartullu kalerrinneqarput
Lars Andersen:

- Suleqaterput umiarsuup sinaanut niaqua imaanut morsussinnaajunnaarlugupitupparput, Søren Mikaelsenilu qinnuigaara arpalluni qatserisartunut kalerrissaarut tooriartoqqullugu. Taamaalinerani suleqatitta inuunini annaanniarunnaarsimavaa. Oqartuarpoq sapilerluni, uanga suaartarlugu nilliaffigaara uumatiinnarusullugu.
Tamatuma kinguninngua politiit aamma qatserisartut tikiupput.

Inuit tallimaallutik ajutoorsimasoq nunamut qaqippaat. Piffissami tassani assut nillertissimavoq noqartaqattaarlunilu.

Lars Andersen talittarfimmi ikiueqqaarpoq. Ambulance tikiummat inuk sukkaannaq napparsimavimmut ingerlanneqarpoq.

Søren Mikaelsen:

- Misigisaq assut tupannarpoq, nuannaarutigaaralu Larsi taamak periataallaqqitsigimmat uangalu ikioriartorlunga. Uanga aatsaat arpattumik taamak oqilatigisumik takuvunga. Ingerlaannangajalluni sianerfigiganni tikiuppoq.

Lars Andersen:

- Ambulancit, politiit aamma qatserisartut ingerlareermata ingilluta eqqissisarpugut cigarettimik pujortarluta. Suulut innaqqippoq uangalu angerlarpunga. Nalunaaqutaq arfineq pingasunut suliartoqqippugut.

Soorunami misigisaq tamatsinnut annilaarnarpoq taamaattumillu marluulluta ilaqutariinnik sullissivimmiittarpugut marloriarluta misigisarput pillugu passussisartunik ilinniarsimasunik oqaloqatiginninniarluta.

Allaaserisaq Royal Arctic Line suleqatigalugu saqqummiunneqarpoq