Aqqaluk Lynge: Sallup silarsuaani
Uissuummineq aammali naamik. Taamak ICC-ip Kalaallit Nunaanni siulittaasua Aqqaluk Lynge qisuariarpoq, ullaap-tungaa ilisimatuussutsikkut nalunaarut nutaat tusaramiuk. Nalunaarummi qulaajarneqarpoq socialdemokraatit statsministeriutitarisimasaat H.C. Hanseni sorsunnersuit aappaata ingerlanerani kingornalu USA-mit naalagaaffissuit kilitsissiarisimasaattut isigineqarsimasoq, knr.gl allappoq.
H.C.Hansenip isertortumik USA Thulemi sakkutooqarfimmi atominik qaartartorsuanik uninngasuuteqarsinnaanera akuersissutigisimavaa, taamaattumik H.C. Hansenip USA-mut kilitsissiaasimasinnaaneranik paasissutissat Kalaallit Nunaannut immikkut soqutiginaateqarput.
- Uissuummissutigaara, kisianni aamma "qanormi oqarpugut"-imik qisuariaateqarpunga, Aqqaluk Lynge oqarpoq.
Aqqaluk Lynge isumaqarpoq, paasissutissat H.C. Hansenip suna pillugu amerikamiut Kalaallit Nunaanni atominik sakkussianik uninngasuuteqarsinnaanerannut akuersissuteqarsimaneranut nassuiaataasinnaassasut.
- Nassuiaat pitsaasuuvoq. Aamma suna pillugu danskinut innuttaasunut pingaartumillu kalaallinut innuttaasunut isertuunneqarsimanersoq.
Aamma isumaqarpoq, pisimasoq ukiorpassuit matuma siornagut pisimagaluartoq tamanna uagutsinnut ullumikkut soqutiginaateqartoq.
- Ilaat oqarput taamanikkut piffissaq allaasoq. Kisianni ullumikkut taamaaginnarpoq. Kalaallit Nunaat nuarsuarmi inissisimanermigut politikkikkut pingaarutilerujussuarmik inissisimavoq. Suli pisoqartarpoq eqeersimaarfigeqqissaagassatsinnik. Kisianni sallup silarsuaanik aatsaat siullerpaamik kingullerpaamillu tusartinneqanngilagut, oqarpoq.
Aqqaluk Lyngep erseqqissarpaa, Ilulissani sapaatip akunnerani kingullermi USA-mit, Canada-mit Danmarkimit, Ruslandimit Norge-millu ministerinit peqataaffigineqartumik ataatsimeersuarnermi peqataasimanera taamaattumik pingaartuusoq.
- Immaqa oqaluttuarisaanikkut sallut uagut inooqataaffigiinnarsinnaasimasatta iluarsiiviginiaraluarnerannut ilaasimasinnaavoq, naggasiivoq.
Oqalutuarisaanermik immikkut ilisimasallip Peer Henrik Hansenip PhD-nngorniarluni soraarummeerummini paasissutissat tamakku suliarisimavai.