Aqqusinermi ajutoorujussuartoqarnerata kingorna angut tigusarineqarpoq
Biilit marluk aporlutik Nuummi aqqusinermi ajutoortoqarneranut atatillugu, politiit angummik 24-nik ukiulimmik tigusarinnipput.
Ataasinngornermi unnukkut biilit marluk Nuummi Brugsenip eqqaani Aqqusinersuarmi aporput.
Politiit oqarnerat naapertorlugu, biilip aappaa aqqusinermi illuanut ingerlasut aqqutaatigut ingerlaneratigut ajutoorneq pivoq.
Angut biilimik ingerlatsisoq ajutoornerup kingorna sumiiffimmit qimaavoq. Politiilli angut marlunngornermi nassaaralugulu tigusaraat, Kalaallit Nunaanni Politiini pigaartut pisortaat, Thomas Ottesen oqaluttuarpoq.
Sumiiffimmi ajutoorfiusumi videomik nakkutilliinermit politiit angutip kinaassusaa paasivaat. Taanna 24-nik ukiulik tigusarineqartoq, killisiorneqartoq pissutissalimmillu pasineqartoq, kingornalu iperagaasoq, pigaartut pisortaat oqaluttuarpoq.
Qimaasimasutut pissutissalimmik pasineqartoq
Angut biilernermut allagartaqarani ingerlatitsisimasutut pissutissalimmik pasineqarpoq, siornatigut pineqaatissinneqarnermigut allagartani annaasimagamiuk.
Angutip ajutoorfiusumit qimaasimanera pissutissalimmik pasilliut sakkortunerusoq, pigaartut pisortaat nassuiaavoq, amerlanerusunillu pasilliuteqartoqarsinnaasoq taassuma oqaatigaa.
Biilit annertuumik ajoquserput, kisianni ajutoornermi inunnik ajoqusertoqanngilaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...