Arctic Circle Business
Arctic Circle Business pisortartaarpoq
Halibut Greenland ApS-p pisortaqarfiani allatsi Juliane Henningsen, 1. oktoberimiit Arctic Circle Business-imi pisortaaninngussaaq.
![Juliane Henningsen flytter 1. oktober til Sisimiut, hvor hun fra det gamle værft skal styre erhvervsprojekterne i Sisimiut og Maniitsooq](https://image.sermitsiaq.ag/123796.webp?imageId=123796&width=960&height=572&format=jpg)
- Julianep suleqatigilernera nuannaarutigeqaara, inuussutissarsiuteqarnermi kattuffimmi siulersuisut siulittaasuat, siulersuisuni siulittaasoq Jens Christian Eldevig tusagassiuutinut nalunaarummi oqarpoq nangillunilu:
- Siulersuisunit Julianep Halibut Greenland Aps-imi attaveqaqatigiinnermut, pilersaarutinillu ataqatigiissaarinermut misilittagai kiisalu nunatsinni politikkikkut suliaqarsimanermigut misilittagai isiginiarsimavagut. Nutaaliorsinnaasumik nunallu immikkoortoqarfiini suleqateqarluni angusarisssaarsinnaalluartumik qinnuteqartut akornanni nassaarpugut.
Juliane Henningsen 33-nik ukioqarpoq Ilisimatusarfimmilu inuiaqatigiilerinermik ilinniagaqarsimalluni. Taanna Inatsisartuni, Folketingimilu ilaasortaasimavoq. Nunafondenimilu ilaatigut siulittaasuusimalluni. Ittukusuk Heilmann inooqatigaa pingasunillu meeraqarlutik.