Arctic Education alliance: Mamartut inuiannit marlunneersut

Inuili, University of Southern Maine aammalu Wabanaki PublicHealth and Wellness peqatigiillutik iganermut najoqqutassiamik atuakkamik saqqummersitseqatigiipput, Kalaallit Nunaanni, Amerikami aammalu Amerikami nunat inoqqaavisa igariaatsit tunngavigineqarput.

Atuakkap INUILI-p peqataaffigisaanik iganermut najoqqutassianik imallip saqqaa. Iganermut najoqqutassiat assigiinngitsut, Kalaallit, Amerikamiut aammalu amerikami nunat inoqqaavisa igariaasiannit isumassarsiorluni suliaapput.

Arctic Education Alliance

Jensine Berthelsen

Published 20 September 2023 - 09:59

Annonse

Amerikamiut nunatsinni najuunnerat assigiinngitsorpassuarnik sammiveqarpoq. Sammiviit ilagaat ilinniartitaanikkut USA-p nunattalu suleqatigiinnerat, tassanngalu maanna atuagaq iganermut najoqqutassianik imalik saqqummersinneqarpoq.

Pinngortitaleriffik ataqatigiissaarisutut inissisimavoq iganermut najoqqutassiat assigiinngitsut atuakkami ataatsimi saqqummersinneqarnissaanut, tassani pinngortitap tunniussaanik nerisassioriaatsinik assigiinngitsunik isumassarsiortoqarsinnaavoq.

Arctic Education alliance (AEA) sunaava?

Arctic Education Alliance (AEA) amerikamiut nunanut allanut ministeriaqarfianit 2020-mi pilersinneqarpoq.
Tassaavoq Kalaallit Nunaanni ilinniartoqarfiit aammalu Amerikami ilinniartoqarfiit suleqatigiiffiat.
Anguniagaavoq ilinniartitaanikkut qaffassaaqataanissaq, nunami aalisarnermilu inuussutissarsiutinut sammippata, takornariaqarnermut tunngappata aammalu attaveqaqatigiinnerit assigiinngitsut aqqutigalugit inoroorsaallaqqissutsimik tunngaveqarluni ingerlatsiviit ilinniartoqarfiillu qaffasissumik ilinniarfiit inuussutissarsiutitigullu ilinniarfiit akornanni Kalaallit Nunaata USA-llu suleqatigiiffiat.
Suleqatigiinneq Namminersorlutik Oqartussat anguniagaannut naapertuuppoq, aammalu AEA Kalaallit Nunaanni ukiuni 21. århundredekkunni sulisussaqarnikkut nukittorsaanissamut tapertaasutut inissisimalluni.

Ilisimatooq Aaju Simonsen Pinngortitaleriffimmeersoq Sermitsiaq.AG-mut oqaluttuarpoq Pinngortitaleriffiup suliami matumani ataqatigiissaarisutut suliassani naammassigaa, tamannalu iganissamut najoqqutassianik atuaganngorlugu saqqummersitsinermik inerneqarluni.

- Suleqatigiinneq assigiinngitsorpassuatigut ingerlanneqarpoq, uanilu tigussaasumik suleqatigiinnermi siunnerfiginikuuarput pinngortitap tunniussinnaasai aallaavigalugit iganermut najoqqutassiornissaq, assersuutigiinnarlugu miluumasut nunamiut neqaat, aalisakkat, paarnat naasullu iganermut atorneqarsinnaasut pinngortitatsinniittut atorlugit suliarineqarsinnaasut matumani tunngavigineqarput, Aaju Simonsen nassuiaavoq.

Iganermut najoqqutassiat pinngortitap tunniussinnaasaanik aallaavillit mamarunartut

Iganermut najoqqutassiat atuaganngorlugu saqqummersinneqaqqammertoq akeqanngitsumik qarasaasiatigut aaneqarsinnaavoq QR-kode atorlugu, tassani pissanganartunik mamarunartunillu isumassarsiorusukkaanni najoqqutassianik peqarluarpoq.

Assersuutigiinnarlugu tuttup neqaateqaruit, savaaqqap neqaateqaruit imaluunniit umimmaap neqaateqaruit kiisalu kapisiliminiuteqaruit, nerisassioriaatsillu aalajangersimasut atornagit nutaaliulaarusukkuit atuagaq isumassarsiorfigisinnaavat, tassanimi illinnasaarluakkanik najoqqutassiaqarpoq.

Atuagaq iganermut najoqqutassianik assigiinngitsunik imalik UNA toorlugu aasinnaavat.