Arctic Hub nutaamik pisortartaartussanngorpoq
Anna-Sofie Skjervedal Arctic Hubimi ukiuni pingasuni allattoqarfimmi pisortaareerluni soraarniuteqarpoq. Ullumi marlunngornermi 15. august naggataamik sulivoq.
Arctic Hub, issittumi ilisimatusarnermik suliaqartunik attaveqatigiinnermik suliaqartoq, allattoqarfimmi nutaamik pisortassarsiortussanngorpoq.
Anna-Sofie Skjervedal, Arctic Hubip ukiut pingasut matuma siorna pilersinneqarneranili pisortaasimasoq, ullumi naggammik sulivoq. Arctic Hub tusagassiorfinnut taama nalunaaruteqarpoq.
- Arctic Hub suliassattut pingaartissimaqaara. Aallaqqaaterpiaanit suleqataalluni nalissaqanngilaq, Arctic Hub allattukkani takorluugaannaariarluni ullumikkut allattoqarfeqarmat aalaakkaasumik tunngavilik, Anna-Sofie Skjervedal oqarpoq.
Arctic Hub danskit naalakkersuisuinit Namminersorlutillu Oqartussanit aningaasalerneqarluni nunatsinni Issittumilu ilisimatusarnermik suliaqarusuttunik attaveqatigiitsitsinermik suliaqarpoq. Arctic Hubimi siulersuisuni siulittaasup, Ulrik Smith Korsholmip erseqqissarpaa Arctic Hubip ilisimaneqarnerulernissaanut pisortaq sulilluarsimasoq.
- Isumaqarpunga Arctic Hub suliassiissutigineqartumik suliarinnilluareersoq. Arctic Hub tusaamaneqarneruleriartuinnarpoq, Kalaallillu Nunaanni ilisimatusarnermut atatillugu suleqatigiumaneqarluarpoq. Anna-Sofie allattoqarfiup pisortaatut tamatuma ineriartortinneqarnerani pingaaruteqarluinnarsimavoq, siulersuisuni siulittaasoq Ulrik Smith Korsholm oqarpoq.
DMI-mi pisortatut atorfinittoq
Anna-Sofie Skjervedal ilisimatusarnermik suliaqartunik unammisitsinermik, Paasisavut-mik suleqataasimasoq, ullumi marlunngornermi 15. august naggataarluni sulivoq. Allattoqarfimmi pisortamik atorfinitsitsinissap tungaanut Arctic Hubimi siunnersorti suliniutinillu aqutsisoq Jula Maegaard-Hoffmann allattoqarfimmi pisortaagallassaaq.
Anna-Sofie Skjervedal nunatta avataani atorfinittussanngorpoq. Atorfittaaminiilli Kalaallit Nunaannut aamma attaveqartussaavoq, DMI-mimi sila pillugu ilisimatusarnermut immikkoortortaqarfimmi pisortanngussangami.
Arctic Hubip nutaamik pisortartaarnissaa qaqugu pissanersoq ilisimatitsissutigineqanngilaq.