Arfanniarneq pillugu ataatsimiinneq ammarpoq
Alaskami naalagaaffiup inuiisa arfanniarnerat sammineqarpoq, Arfanniarnermut Kommissionip IWC-p 59-issaanik ataatsimiinnera ataasinngormat Alaskami Anchoragemi ammarneqarmat.
Naalagaaffiit IWC-mut ilaasortaasut 75-it angullugit amerlassusillit, NGO-t 80-it missaanniittut tusagassiortullu taamatuttaaq amerlatigisut Hotel Captain Cook-imi piareersimapput, Tassani nalunaaqutaq qulinngortoq siulittaasup William Hogarthip (USA) ataatsimiinneq ammartutut nalunaarutigaa.
Ammaanersiornermi oqalugiartut ilagaat Alaskap guvernøria, Sarah Palin, senatorialu Ted Stevens. Marluullutik erseqqissarpaat arfanniarneq Alaskap inuiinut pingaaruteqartorujussuusoq. Marluullutik peqataasunut sakkortuumik kajumissaarutigaat Alaskap inuiisa ukiunut tallimanut tulliuttunut arfivinnik pisassaat akuersissutigeqqullugit.
– Ataatsimiinneq manna innuttatsinnut nunap inoqqaavinut aalajangiisuusumik pingaaruteqarpoq amerikarmiut tamarmik tapersersugaat. Neriuppunga ataatsimiittut arfivinnik pisaqarsinnaanerat akuersaarlugulu tapersersussagaat, Ted Stevens oqarpoq.
Alaskap gunervøriata Sarah Palinip ullut 28. –31. maj suaarutigai "Alaska Whale Week"-itut.
Aqagu marlunngornermi, IWC-p Nunat Inuiisa Piniarnerat, Aboriginal Subsistance Whaling, sammissavaat. Tamatumani ilanngullugu Kalaallit Nunaata tikaagullinnik 200-nik, tikaagulliusaanik 9-inik, qipoqqarnik 10-nik arfivinnillu marluugallartunik pisassinneqarnissaminik kissaataa.
Danmarkip nalunaarutigaa Kalaallit Nunaata siunissami arfattassaata oqaluuserineqarnissaanut tatillugu aallartitat assinik sarsuatittakkanik takutitsiniartut.