Arktisk Kommando ukiuni qulini nunatsinniissimalerpoq
Arktisk Kommando ataasinngormat ukiut qulinngortorsiorpoq. Nalliuttorsiorneq umiarsuarmi Tritonimi, Nuummi tulanngasumi nalliussineqarmat tusarnaartitsisoqarpoq oqalugiartoqarlunilu.
Arktisk Kommando ataasinngormat ukiut qulinngortorsiorluni nalliuttorsiormat Nuummi silaqqippoq. Nalliuttorsiorneq umiarsuaq nakkutilliiartortartumi Tritonimi malunnartinneqarpoq. Qaaqqusat ilagaat Danmarkimi Illersornissaqarfimmeersut, Kalaallit Nunaanni suleqataasut soorlu politiit kiisalu amerikamiut nunatsinni konsulatiat. Nalliuttorsiornermi tusarnaartitsisoqarpoq oqalugiartoqarlunilu.
Arktisk Kommando Facebookimini taama allappoq.
Arktisk Kommandomi illersornissamut pisortaq Flemming Lentfer oqalugiarnermini erseqqissarpaa Issittumi ukiuni qulikkaani kingullerni ineriartornermi pingaaruteqarluinnalersimasoq nakkutilliineq, suleqatigiinneq ataqatigiissaartumillu sullissineq.
- Arktisk Kommando Illersornissaqarfiup Issittumi suliaqarnerani ukiuni qulini kingullerni pingaaruteqarluinnarsimavoq. Kommando ilaatigut sakkutooqarnikkut sulianik kivitsisarsimavoq, annaassiniarnermut sungiusaasarluni kiisalu politiinik ikiuuttarluni. Taamaasilluni Illersornissaqarfik Kalaallit Nunaanni Savalimmiunilu sumiiffinnut arlalinnut tikissinnaasarpoq, general Flemming Lentfer oqarpoq.
Arktisk Kommando naalagaaffiup killeqarfianik nakkutilliinermik suliaqartarpoq kiisalu nunatsinni annaassiniaanernik aamma suliaqartarluni.
Sulisut 95-it
Grønlands Kommando Savalimmiunilu Kommando suleqatigiilermata, Arktisk Kommando 31. oktober 2012 pilersinneqarpoq. Arktisk Kommando ullumi 95-inik sulisoqarpoq. Taakku Nuummi, Thule Airbasemi, Station Nordimi, Kangerlussuarmi, Grønnedalimi, Mestersvigimi, Daneborgimi, Københavnimi Kartellemi, Aalborgimi kiisalu Savalimmiuni Thorshavnimi sulipput.
- Arktisk Kommandomi sulisut pingaaruteqarluinnarput. Taakku sungiusimasatik qimallugit, sumiiffik nutaaq, silaannaq allaanerusoq kulturilu allarluinnaq tikillugu suliartortarput. Taakku ulluinnarni sulinerisigut Arktisk Kommandop suliassat naammassisinnaasarpai, Brigadegeneral Poul Primdahl oqalugiarnermini oqarpoq.
Arktisk Kommandop nalliuttorsiutigineqarnerani assit amerlanerusut Facebookimi saqqummiunneqarsimasut takusinnaavatit: