Arnap toquneranut angut sapaatip akunneri sisamat politiinit tigummigallarneqassaaq

Angut 44-nik ukioqartoq juunip 26-ata tungaanut politiinit tigummigallarneqassaaq.

Tamanna Sermersuup Eqqartuussiviani Nuummi killisiuinermi eqqartuussisup aalajangerpaa.

Angutip nulia 38-nik ukioqartoq sisamanngornerup ullaavani toquvoq.

Killisiuinermi 44-nik ukiulik oqarpoq unnuk eqqaamasaqarfigivallaarnagu, imigassartorsimanerup kinguneranik kiisalu angutip oqarneratut nuliaminit niaqukkut annersinneqareernermi kingorna.

Arnaq blok 5-imi annersartereernermi kingorna ambulancenik napparsimaviliaanneqartariaqarsimasoq Sermitsiaq.AG-imit allaaserineqareerpoq.

Politiit aappariit inaannut apuummata arnaq toqungavoq, Dronning Ingridip Napparsimavissuanilu nalunaaqutaq 03.47 toqusoq nalunaarutigineqarluni.

Pinngitsuunerarpoq
Killisiuinermi aappariinnerat qanoq innersoq angut ima akivoq:

- Oqqattuaannarpugut, nuliara ningartarpoq. Ilaqutariittut ikiorserneqarnikuuvugut, atornerluinitsinnillu katsorsartinnikuulluta.

Angut 2004-mi 2010-milu nakuusersimanini pissutigalugu ulluni 28-ni isertitsivimmiinnikuuvoq.

Aamma tigummigallarneqarnissaanut aalajangerneqarpoq assilineqarsimasut tunngavigalugit, kiisalu meeqqaminnik sunniisinnaanera pissutigalugu.

Angut 44-nik ukiulik illersuisuni minutsimi ataatsimi oqaluutereeramiuk oqarpoq pisumut pinngitsuunani.