Arnaq 25-nik ukiulik Sisimiuni toqutsisoqarneranut atatillugu tigummigallarneqarpoq

Arnaq 25-nik ukiulik ulluni 28-ni tigummigallarneqartussanngorpoq. Taanna arnap 55-nik ukiullip pingasunngornermi unnukkut Sisimiuni savimmik toqunneqarnera pillugu suliami toqutsisimasutut unnerluutigineqarpoq.

Kalaallit Nunaanni Politiit tusagassiuutinut nalunaarummi ilisimatitsipput.

Politiit suliamik misissuineranni Eqqartuussisoqarfiup Qeqqata arnaq pasineqartoq tigummigallarneqartussanngorlugu aalajangiuppaa.

Danmarkimit ikiorserneqartut

Tallimanngornermi Danmarkimit pinerluttoqarsimatillugu misissuisartut toqusunillu misissuisartunit ikiuiartortunik tikittoqassasoq, Sisimiuni Politeeqarfimmi aqutsisoq, politikommissær Karl Jørgen Lennert ilisimatitsivoq.

Sisimiuni arnaq savimmik kapineqarsimasoq, politiit pingasnngornermi nalunaaqutaq 20.56 nalunaarfigineqarput. Arnaq taanna 55-nik ukiulik erngertumik napparsimmaviliaanneqarpoq, inuunerali annanneqarsinnaasimanngilaq, nalunaaqutaq 21.30 toqusutut nalunaarutigineqarpoq.

Nalunaaqutaq 22.20 politiit arnaq 25-nik ukiulik tigusaraat, taanna sisamanngornermi Eqqartuussisoqarfik Qeqqatami inatsit tunngaviusoq naapertorlugu sassartinneqarpoq.

Politiit suliaq pillugu oqaaseqarsinnaanerat maanna killeqarpoq, suliaq matoqqasumik ingerlanneqarmat. Politiit taamaattumik maannamut allanik oqaaseqarsinnaanngillat.