Arnaq annertuumik innarluutilik paaqqinniffimmi pinngitsaalillugu arneriffigineqarsimasoq: Maanna meerartaarpoq
Arnaq inuusuttoq innarluutilik tallimanngornermi meerartaarpoq naartunera kimilluunniit siumoortumik ilisimasaqarfigineqarsimanani. Arnaq annertuumik innarluuteqarpoq oqalussinnaanani pisussinnaananilu. Oqartussanit ilimagineqarpoq arnap ataasiarluni arlaleriarluniluunniit atornerlugaasimanera naartulerneranik kinguneqarsimasoq. Politiit suliamik paasiniaapput.
Suliaq amiilaajummernartoq ulluni kingullerni nittartakkani inuit attaveqatigiittarfiini ingerlaartinneqarsimavoq. Suliami pineqarpoq arnaq inuusuttoq annertuumik innarluutilik, tallimanngormat nukappiarannguamik meerartaartoq, naak erninissaa sioqqullugu sulisunit ilaqutaasunilluunniit arnap naartunera ilisimasaqarfigineqanngilluinnarsimagaluartoq.
Arnaq annertuumik innarluuteqarpoq paaqqinniffinnilu sulisunik paaqqutarinnittumik taassuminnga isumaginnittussatut atorfinitsinneqarsimasunik isumalluuteqarluinnartuulluni. Oqalussinnaanngilaq pisussinnaananilu, taamaattumillu ilimagisariaqarluni atoqatiginninnisamut akuersaarsinnaasimanavianngitsoq.
Taamaattumik tallimanngormat Kalaallit Nunaanni Politiinut suliaq pillugu unnerluutiginnittoqarpoq. Meeqqanut, Inuusuttunut, Ilaqutriinnut Peqqissutsimullu Naalakkersuisoq, Mimi Karlsen (IA), ualeq manna videomik Facebookimut ikkussisimavoq, tassanilu pisimasoq oqaluttuaralugu.
Politiit suliaq pillugu suli oqaaseqarusunngillat
Arnaq qasseriarluni pinngitsaalillugu arneriffigineqarsimanersoq, aamma kina meeqqamut ataataanersoq, ilisimaneqanngilaq, kisianni Mimi Karlsenip sukumiilluinnartumik misissuisoqarnissaa qinnutigisimavaa.
Kalaallit Nunaanni Politiit Sermitsiaq.AG-mut uppernarsarpaat unnerluussummik tigusaqarsimallutik, kisiannili maannamuugallartoq suliamut maanna paasiniaanikkut misissuiffigneqartumut annertunerusumik oqaaseqarusunnatik. Taamaattumik suliami pasisaqarnerlutik aamma paasissutissiissutigisinnaanngilaat.
Arnap arnaa KNR-imik oqaloqateqarsimasoq
Arnap arnaa KNR-imut oqaluttuarpoq, panimmi naartuneranik ilisimasaqanngilluinnarsimalluni, aamma Ivaaqqami sulisut tallimanngormat panini napparsimmavimmut unitsinneqarmat sumik ajortoqarneranik oqaluttuukkumasimanngikkaanni. Panimmi meerartaarsimanera napparsimmavimmut apuukkami aatsaat paasisimavaa, tamatumanilu isumaginninnikkut oqartussanit aperineqarsimalluni, nukappiaraq inoorlaaq paarerusunneraa.
- Paninnguara imminut illersorsinnaanngilaq, oqaluttuussinnaanngilaanga qanoq innerluni, taamaammallu oqaluttuussinnaanngilaanga kinguaassiuutitigut atornerlunneqartarsimalluni naartulersinneqarsimallunilu. Naluara isumaginnittoqarfimmiut qanoq malussarniuteqarnersut, taamaattorli panimma atornerluisuata kinguaavata uannut isumagitinniarneqaraluarnera killissamik annertuumik qaangiineruvoq paasisinnaanngilaralu taama aperineqarsinnaagama, Maibritt Lothsen KNR-imut oqaluttuarpoq.
Mimi Karlsenip suliaq videomi, Facebookimi qupperneratigut siammarterneqarsimavoq eqqartorpaa. Video uani isiginnaaruk: