Arnaq aqqusinermi ajutoornikkut toqusimasoq
Ataasinngornermi arnap 82-inik ukiullip Aasianni minibusimit aporneqarnermi kingorna ajoqusersimanini toqqutigisimavaa. Bussimik aquttoq mianersuaalliorluni toqutsisimasutut unnerluutigineqarpoq.
Aasianni Politiit ataasinngornermi ualikkut nalunaarfigineqarsimapput, Aasianni Frederik Lyngesvejimi ajutoortoqarsimasoq.
Politiit ajutoorfimmut takkukkamik paasisimavaat, arnaq bussimit mikisumik aporneqarsimasoq. Kalaallit Nunaanni Politiit tusagassiorfinnut taamatut nalunaaruteqarlutik ilisimatitsipput.
Politiit ajutoorfimmut takkunnerisa kingunitsiannguatigut arnaq ajoqusersimanermit toqquteqarsimavoq, bussimillu aquttoq mianersuaalliorluni toqutsisimasutut unnerluutigineqarluni.
Politiit ajutoorfimmik misissuineritigut ajutoortoqarsimaneranut suna pissutaanersoq paasineqassaaq. Kalaallit Nunaanni Politiit taamaammat suliami pissutsinik allanik erseqqinnerusumik maannakkorpiaq ilisimatitsissuteqarsinnaanngillat.
Arnap ilaqutai pisimasoq pillugu ilisimatinneqarsimapput.