Arnaq ingerlaannaq pineqaatissinneqartoq: Hashimik 1,4 kg-mik nassataqartoq
Arfininngormat arnaq hashimik eqqusseriaraluartutut tigusarineqarpoq. Sapaammi qaammatini tallimani pineqaatissinneqarsimasut inissiisarfianniittussanngorlugu eqqartuunneqarpoq.
Arfininngornermi ullaap tungaani ilanngaaserisut misissuinermut atatillugu arnap unitsinneqarnerata kingorna, Kangerlussuarmi tigusarineqarpoq.
Arnaq Kangerlussuarmi unnuiniarluni pilersaarsimavoq, tassanngaanniillu Sisimiunut billetimik pisiniarsimavoq, kisianni tassunga killissimanngilaq.
Tassami arnaq hashimik 1,455 kg-mik tigummiaqartoq paasineqarpoq, Kalaallit Nunaanni Politiit pigaartuisa pisortaat, Bjørn Bjerregaard, Sermitsiaq.AG-mut ilisimatitsivoq.
Sapaammi ingerlaannaq pineqaatissinneqartoq
Haship ilaa arnap timaanut nipinnertuumik qilerneqarsimavoq ilaalu iisimavaa.
Arnaq sapaammi ingerlaannaq pineqaatissinneqarmat, suliaq sukkasuumik naammassisimasoq, pingaartut pisortaat oqaluttuarpoq.
Qaammatini tallimani pineqaatissinneqarsimasut inissiisarfianniittussanngorlugu pineqaatissinneqarpoq. Arnaq kingusinnerusukkut inissinneqartussatut iperagaagallarpoq.
Sapaatip akunnerata ingerlanerani aappassaanik taamatut pisoqarpoq, tassa Kangerlussuarmi politiit inummik hashimik eqqusseriartumik tigusarinnipput.