Arnaq inuusuttoq toqutsisimasutut pisuutinneqartoq
Arnaq 26-inik ukiulik arnamut 55-inik ukiulimmut toqutsisimasutut, anaanaminullu nakuusersimasutut pisuutinneqarpoq.
Qeqqata Eqqartuussiveqarfiani inimi eqqartuussiviusumi siullermi arnaq 26-inik ukiulik issiavoq. Taanna immikkoortunut marluusunut unnerluutigineqarpoq. Siulleq Sisimiuni arnamut 55-inik ukiulimmut toqussisimanermut tunngavoq, aappaalu anaanaminut nakuusersimanerminut tunngalluni. Unnerluutigineqartup anaanani qutuatigut savimmik kapisimavaa.
Arnamut 55-inik ukiulimmut toqutsineq februaarup ulluisa arfineq-pingajuanni siorna 2023-imi pivoq. Toqutaasoq katillugit sisamariarluni savimmik kapineqarsimavoq. Tunuatigut pingasoriarlugu qungasiatigullu ataasiarlugu kapineqarsimagami.
Unnerluutigineqartoq toqutsinermi nalaani 25-nik ukioqartoq Qeqqata Eqqartuussivianit pisuutinneqarpoq. Qanorli pineqaatissinneqarnissaa suli aalajangerneqanngilaq, eqqartuussiviup aalajanginnginnermini nakorsamit oqaaseqaat utaqqimmagu.
Unnerluussisussaatitaasup suliami piumasarisimavaa arnaq 26-nik ukiulik Danmarkimi tarnimikkut napparsimasut napparsimmavissuaniitinneqassasoq.
Pinerluttuliorneq ingasannerpaaq
Arnap 26-nik ukiulik, takisuunik aappalungusersunik qalipanneqarsimasunik imusarnikunillu nujaqarpoq, eqqartuussivimmi eqqartuunneqarnermini pappiaqqamut ammut sikingalluni isigivoq pappiaqqallu quppersakkat Sudokunik imallit allattuiffigalugit. Denimimik kavaajaasaqarpoq qungasianilu tusarnaarutit siutequtit inissisimapput. Taama inissisimavoq unnerluussisussaatitaasup illersuisullu eqqartuussiviup aalajangiinnginnerani inaarutaasumik oqaaseqaasertik atuarmassuk.
- Toqutsineq tassaavoq pinerluttuliorneq ajornerpaaq. Uumasutut qaasuttutut pissuseqarluni saassussilluni toqutsisoqarpoq, unnerluussisussaatitaasoq Cecilie Stürup Sørensen eqqartuussisumut inaarutaasumik oqaaseqaatini atuartillugu taama oqarpoq.
Eqqartuussivimmi nassuiaatigineqarpoq arnaq maanna eqqartuussaasoq unnuaq taanna tigusarineqarami savinnik tallimanik tigummiarsimasoq.
- Nassuerutigissavara una suliaq misilittakkanni ajornarnerpaajuvoq, ilungersunarpoq tamatsinnut, illersuisoq Christina Johnsen naggataarutaasumik oqaaseqarami oqarpoq.
Eqqartuunneqarluni pisuutinneqartoq qanoq pineqaatissinneqassanersoq tallimanngorpat ullaakkut aalajangerneqassaaq.