Arnaq kokainimik eqqussisutut ingerlaannartumik pineqaatissinneqartoq

Arnaq 27-nik ukiulik nunatsinnut kokainimik sisamanngornermi 30. november eqqusseriarsimasutut eqqartuunneqarami, ukioq ataaseq qaammatillu arfinillit pineqaatissinneqarsimasunut inissiisarfimmiittussanngortinneqarpoq.

Politiit tusagassiorfinnut taama allapput.

- Arnaq 27-nik ukiulik Kangerlussuup mittarfiani akitsuuserisunit sisamanngornermi 30. november unitsinneqarpoq. Timi tamakkerlugu scannerummik misissuinerup takutippaa arnaq ikiaroornartumik timiminiittoqartoq, misissuinerillu takutippaat arnap kokain 55,5 gram iisimagaa, politiit allapput.

Nassuertoqarnerani suliarineqartoq

Arnaq ikiaroornartunik eqqussisutut unnerluutigineqarpoq, unnerluussullu nassuerutigalugu. Tamatuma kingorna suliaq eqqartuussivimmi nassuerutiginninnertut suliarineqarpoq.

Eqqartuussivimmi aalajangerneqarpoq arnaq ingerlaannartumik pineqaatissinneqassasoq. Pineqaatissiissut unnerluutigineqartup unnerluussisussaatitaasullu akueraat.