Arnaq toqungasoq nassaarineqarsimasoq - sumiiffik assiaqusersorneqarsimavoq
Sisimiuni arnaq toqungasoq nassaarineqarmat, politiit nassaarfiusoq assiaqusersorsimavaat. Toqusimaneq pasinartutut misissuiffigineqarpoq.
Takuuk: Ilanngutassiaq Jan Lambertenip oqaaseqaatai ilanngullugit nal. 12.15 nutarterneqarpoq
Kalaallit Nunaanni Politiit naatsumik nalunaaruteqarlutik ilisimatitsissutigaat, sisamanngornermi nalunaaqutaq 9.56 nalunaarutigineqarsimasoq, arnaq uumanngitsoq nassaarineqarsimasoq.
Arnaq pineqartoq Sisimiunit Kaaleeqqap Aqqutaani nassaarineqarsimavoq
- Politiit maanna sumiiffimmiipput sumiiffillu assiaqusersorsimallugu. Misissuineq aallartinneqarpoq, suliarlu pasinartutut misissuiffigineqarluni.
- Innuttaasut qinnuigineqarput assiaqusersuisimanermut ataqqinneqqullugit, Politiillu sumiiffimmi suliaqarnerannut akornusiinaveersaaqqullugit. politiit maannakkorpiaq suliamut atatillugu allanik paasissutissiisinnaannginnerartut allapput.
Silami pinerluuteqartoqarsimasoq
Jan Lambertsen Kalaallit Nunaanni Politiit misissuisartuisa pisortaa sisamanngornermi ullup-qeqqanut ilisimatitsivoq, politiit pinerluffiusimasumi misissuinertik naammassileraat.
- Toqusoqarnerani pinerluuteqartoqarsimanera suli ilimagineqarpoq, Jan Lambertsen oqarpoq pasineqarpoq.
Taassuma oqaatigaa, Sisimiut illoqarfiata qeqqata nalaaniittumi silami pinerluuteqartoqarsimanera pineqartoq. Suliamut atatillugu suli tigusarinnittoqarsimanngilaq, Jan Lambertsenilli tigusarinnittoqarumaartoq neriuutiginerarpaa:
- Annertunerusumik oqaaseqarsinnaanngilanga, takussutissaateqarpugulli misissoqqitassatsinnik taamaammat paasisaqarnissarput neriuutigaarput, Jan Lambertsen Sermitsiaq.AG-mut oqarpoq.