Arnaq toqutsisimasorineqarluni tigusarineqarsimasoq
Angut 48-nik ukiulik Tasiilami toqungasoq ataasinngormat nassaarineqarpoq. Arnaq 41-nik ukiulik toqutsisimasutut pasineqarluni unnerluussaasimavoq.
Kalaallit Nunaanni Politiit ataasinngornermi ualikkut nalunaaqutaq 17.10 nalunaarfigineqarput, Tasiilami inissiami inut toqungasoq nassaarineqarsimasoq.
Politiit inissiamut alakkarterisimapput, sumiiffimmilu takussutissat tunngavigalugit suliaq toqutsisimanermut attuumassuteqartutut misissorneqassasoq aalajangersimallutik.
Politikommissæri Brian Thomasen ataasinngornermi unnukkut tusagassiorfinnut nalunaaruteqarnermi allappoq.
Politiit najugaqarfimmi angut 48-nik ukiulik toqungasoq nassaarisimavaat. Arnaq 41-nik ukiulik suliami pasineqarluni tigusarineqarsimavoq. Toqungasoq tigusarineqartorlu imminnut qanigisariittut ilisimatitsissutigineqarpoq.
- Kalaallit Nunaanni Politiit suliamik misissuipput, tassungalu atatillugu Danmarkimi misissuisartut suliap misissuiffigineqarnerani ikiuuttusat attavigineqarsimallutik. Misissuinermi aallaqqaasiullugu qulaajaaffigineqassaaq, 41-nik ukiulik tunngaviusumik inatsit naapertorlugu killisiorneqassanersoq, Brian Thomsen allappoq.
Toqusimasup ilaqutai ilisimatinneqarsimapput.
Suliaq ullualuit ingerlanerinnaanni Tunumi toqutsisoqarsimasorinninnerup aapparaa. Januaarip aallaqqaataani Tasiilap nunaqarfiani Sermiligaami toqutsisimasoqarsinnaaera nalunaarutigineqarpoq. Tassani angut 42-nik ukiulik toqungasoq nassaarineqarsimavoq, angullu 18-inik ukiulik toqutsisimasutut unnerluutigineqarluni tigusarineqarsimalluni.