Arnat amerlanerit piniariarusuttalersimasut
Arnat sunngiffimmi piniartutut allagartallit ukiut tallimat kingulliit ingerlaneranni 53 procentimik amerleriarsimapput. 2019-imi arnat piniarnissamut allagartallit 900-nit amerlanerusimapput.
Angutit kisimik qaqqani sivisoorsuarmik pisullutik tuttunniarlutillu umimmanniartanngillat. Arnat amerliartuinnartut aamma piniariarusuttalersimapput.
Piniarnermut allagartat pillugit Naatsorsueqqissaartarfiup kisitsisaataasa kingulliit takutippaat, arnat sunngiffimminni piniariartartutut allagartallit 2015-imi 611-usimariarlutik 2019-imi 937-nngorsimasut. Tassa 53 procentimik amerleriarsimapput.
Nivikka Brandt Nuummeersoq arnat piniariarnissamik nuannarinnilluinnalersimasut ilagaat. Ukiut tallimat-arfinillit matuma siornatigut siullermeerluni sunngiffimmi piniartutut allagartartaarpoq, ullumikkullu allagartani pinngitsoorsinnaanngilluinnarlugu:
- Taannartaa nuannarinerpaagunarpara. Aallaraanni kiffaanngissuseqartutut misigisimanarpoq, pinngortitamiilluni tuttunik ujaasinissaq, pisaqarnissaq angerlamullu assartuinissaq eqqarsaatigalugit pissanganartarpoq, Nivikka Brandt ulluinnarni Sulisoqarnermi siunnersortitut atorfilik oqarpoq.
Aallaammik seqqornissaq ilinniaqqaartariaqarsimagaa
Ilaqutariinni piniariartartuni alliartorsimavoq, tamannalumi inuuneranut sunniuteqarsimavoq:
- Ataatanga qatanngutikkalu angutit piniariartuaannarsimapput. Tamanna alliartorfigivara. 1994-imili Danmarkimut nussimavugut, Kalaallillu Nunaannut 2014-imi uternissama tungaanut piniariartarunnaarsimallunga.
- Taamanikkut aalajangerpunga nammineerlunga piniariartalerniarlunga. Aallaammilli aallannissinnaaneq ilinniaqqaartariaqarsimavara, Nivikka Brandt oqarpoq.
Nivikka Brandtimut piniarnikkut nerisassatigut imminut ilaquttanillu isumaginnittarneq isumalipilussuuvoq. Uumasut nammineq pisarisani isumagisarpai, amiinit qaqqamit assartuinermut aamma neqip puuguttami piareerlugu nereriaannanngornissaanut.
Allatut nukissaqartitsilersartoq
Nivikka Brandtilumi arnat amerliartuinnartut sooq piniarnermut allagartartaartalernersut pillugu imatut oqarpoq:
- Isumaqarpunga kiffaanngissuseqarnermik misigisitsisarnera tassani pineqartoq. Allatut nukissaqartitsilersartutut misinnartarpoq. Aamma arnat piniariaqatigiikkaagamik ataqatigiilluartarput, taamaammallu immaqa amerliartuinnartut qanoq nuannertartigisoq tusarangaamikkut piniartunngorusuttalersimassapput, Nivikka Brandt oqarpoq.
Arnat sunngiffimminni piniartutut allagartallit 900-t sinnerlugit amerlassuseqalersimagaluartut, piniariartarneq angutinit suli atugaanerujussuuvoq. 2019-imi angutit sunngiffimmi piniartutut allagartallit 3.923-usimapput.
Inuussutissarsiutigalugu piniartutut allagartallit qimerluualaaraanni, agguaqatigiissinnerat suli malunnarneruvoq. Tassani arnat allagartallit 17-iinnaagamik angutillu 2.118-iullutk.