Arnat aqulerput
Siumup Folketingimut ilaasortaatitaanni kinguaarit nikipput Doris Jakobsenip Lars-Emil Johansen katillugit ukiuni 16-ani Folketingimi ilaasortaasimasoq taarsermagu
33-nik ukiulik Doris Jakobsen Siumumeersoq nunatsinniit Folketingimut ilaasortaatitaasut aappaattut qinigaavoq. Ullumikkut qinersinermi Siumut siariarpoq qinersinermi 35,9 procentinit taagorneqarami, 2007-mi 32,2 procentiusunit taaneqarluni.
Siumup siulittaasuata Aleqa Hammondip Folketingimut qineqqusaartut sisamat tulluussimaarutigai qineqqusaarnermi angusaqarluarmata.
- Folketingimut qineqqusaartitavut qineqqusaarnermi angusaqarluarput. Pikkorillutillu piareersarluarsimapput. Qineqqusaarluarput. Doris Jakobsenip Folketingimut qinigaaneratigut Siumup Folketingimut ilaasortaatitaanni kinguaariit nikipput, kapitali nutaaq aallartippoq piffiillu nutaat atulerlutik. Aamma avaqqunneqarsinnaanngilaq kinguaariit nutaat aqutsilersut arnaammata. Tamanna tulluussimaarutigalugulu nuannaarutigaara, Aleqa Hammond oqarpoq.
Aamma isumaqarpoq Doris Jakobsen tunniusimalluarluni naalakkersuinermik sulisuusoq Siumullu politikkiata sulissutiginissaanut nukissaqarluarluni.
- Doris Jakobsen ataasiinnarmik ukioqartoq namminersornerulernerput eqqunneqarpoq. Naalakkersuinermi suliaqartuni kinguaariinni nutaani inissisimavoq. Unammillernermik nuannarisaqartuuvoq tunuarsimaartuunani tunaartaqarluartumillu sulilluni, ersarissumillu takutippaa naalakkersuinermik sulialinni kinguaariit nutaat qanoq ittuunersut. Nammilersulivinnissamut ingerlaarnissaq ilisimalluarpaa, naallu inuusukkaluaqaluni naalakkersuinikkut misilittagalissuuvoq, Aleqa Hammond oqarpoq.