Arnat klubbiat Sanami pinnguartarfimmut aningaasanik tunissuteqartoq

Dronning Ingridip Napparsimmavissuani meeqqat uninngasut qungujunnissaannut pissutissaqarluarpoq. Meeqqammi nutaarluinnarmik pinnguartarfittaarput.

Meeqqat taamaalillutik suliaritinnernit aamma napparsimanermut ersiutaasunik oqalunnermit, napparsimanermit aamma misissortinnernit allamut saalaarnissaminnut periarfissaqalerput.

Ullut marluk qaangiuppata ammassaaq
Nuummi Ladies Circlemit aningaasaliissutaasimasut 100.000 koruunit atorlugit Nuummi meeqqanut issakatsiaarfilimmik, qeerlumiusaarfilimmik sisusarfilimmillu pinnguartarfiliortoqarpoq, tamatumalu saniatigut meeqqanut immikkoortortaqarfik pinngussanik oqorutinillu pissarsilluni.

Pinnguartarfik juulip aallaqaataani naammassineqarpoq pisortatigoortumillu aggustip ulluisa 17-anni nal. 14.30-imiit 15.30-imut, Peqqissutsimut Naalakkersuisup Doris Jakobsenip allunaasamik kipisineragut atoqqaartinneqassalluni.

Anersaarfissaqartoq
Napparsimmavimmit arnat klubbiannit tunissuteqarneq nuannaarutigineqarpoq.

- Arlaannik patsiseqartumik Dronning Ingridip Napparsimmavissuanut attuumassuteqarnermi aliikkutaqarniarluni allamukarfissaqarneq meeqqanut ilaqutaasunullu annertuumik pingaaruteqarpoq, aqutsisoqarfiup pisortaa Joanis Erik Køtlum oqarpoq.

Atuaruk: Akuersissut: Peqqissartut illuanni akeqanngitsumik ineqateqarsinnaaneq nerisaqarsinnaanerlu