Arnat ulluat: Inatsisartuni naligiisitaanissamut aqqut takivoq
Inatsisartunut ilaasortanit 31-usunit qulingiluaannaat arnaapput
Ukiut 70-t matuma siorna Nunatsinni arnat qinersisinnaatitaalerput. Nalliuttorsiutigineqarneratali qanoq annertutiginissaa apeqqutaavoq.
Tassami Inatsisartut amerlanersaat suli angutaapput. Ilaasortanit 31-usunit angutit 21-usut arnat pingajorarterutiginngilaalluunniit.
Assigiinngissuseq atorluarneqarli
Nunarsuaq tamakkerlugu Arnat Ulluannut atatillugu aamma pitsanngoriaateqartoqarnissaanut iinissaqartoq, arlallit oqaatigaat.
Siumumit Juaanna Abelsen-Petersen Inatsisartunut qinigassanngortittoq aamma Ane Lone Bagger, Avannaata Kommuniani kommunalbestyrelsimut ilaasortaq, qinersisoqalerpat arnat amerlanerusut qinigassanngortinnissaat kaammattuutigaat.
- Isumarpullu malillugu politikkikkut suliaqarnermi arnat amerlanerusut suleqataalernersigut sinaakkusersuinerit ersarinnerusut anguneqarsinnaasut. Oqanngilagut angutit ajornerutillugit inissiilluta, taakku ilanngussami allaaserisaqarput.
- Kisianni eqqarsartaatsikkut suleriaatsikkullu nalunngilarput, siammasinnerusumik isumaqarneq aaliangiinerillu pillugit, qaratsat assigiinngissuseqartut eqqarsartaatsikkullu siammasinnerusumik inississagutta, arnat angutillu politikkimi naligiinnerusut pisariaqartikkivut.
Siumup aamma arnat amerlanerusut qinigaatinnissaannut sulissuteqarsinnaapput. Inatsisartunut ilaasortaatitaannit 13-iusunit arnat pingasuinnaarpput.
- Assigiinnerusumik agguaassineq
Arnat amerlanerusut qinigassanngortinnissaat aamma Inuit Ataqatigiinnit kaammattuutigineqarpoq.
- Angerlarsimaffimmi arnat angutillu naligiikkaangamik angerlarsimaffimmut sunniuteqarluartarnera assigalugu, Inatsisartut aamma arnanit angutiniillu assigiimmik peqataaffigineqarunik sunniuteqarluarnerussapput, Inatsisartunut ilaasortat Bendt B. Kristiansen aamma Aaja Chemnitz Larsen ilanngussami allapput.
Taakku namminneq partiiminnut qiviarunik, arnat sisamaannaasut angutillu arfineq-marluusut takussavaat. Partii Naleqqap ilaasortai pingasut angutaannaapput, illuanik Demokraatit marlunnik arnartaqarlutik ataatsimik angutitaqarput.
Partiit qinigassanngortitaasa allattorsimaffianni arnat angutillu qanoq agguarneqarsimanerat sapaatip-akunneri marluk qaangiuppata paasissavarput.
Juaanna Abelsen-Petersenip aamma Ane Lone Baggerip ilanngussaat tamakkerlugu aviisimi Sermitsiami atuarsinnaavarsi. Elektroniskiusoq unnugu saqqummissaaq.