takornariaqarneq
Arnep Sarahp takornariartitsinermik takorluugartik piviusunngortippaat
Kujataani angallammik annaassiniutaasimasumut ilaallutit ullut arfinillit angalagit. Nerigit, sinigit aamma kangerlummi angalallutit nuna qaqqaqartoq kusanartoq, siorna UNESCO-p nunarsuarmioqatigiit kingornussassaasa allattorsimaffianut ilanngussimasoq angalaffigiuk.
Kalaallit Nunaat tamakkerlugu takornariaqarneq ineriartorpoq.
Imaatigut angalatitsinermik saqqummersitsisut
Suliniutit nutaajunerpaartaat qulimiguulimmik timmisartortarput Johan Arne Fleischerip aamma Sarah Woodallip pilersippaat. Taakku suliffeqarfik: Greenland Expeditions by Land and Sea pilersippaat, taanna nunanit tamalaaneersunut saaffiginnittuuvoq.
Aappariit angallat annanniutaasimasoq ''NakuaK'' pisiaralugulu aqqaneq-marlunnik ilaasoqarsinnaanissaanut akuersissummik pissarsissiffigisimavaat.
- Ukiuni arlalinni pilersaarusiornerup kingorna, angallatillu eqqortup nassaariniarnerata kingorna nammineq suliffeqarfiuteqaleratta tulluusimaarutigaarput. Soorunami una aallarniutaannaavoq. Maanna sulinerup oqimaannertaa aallartippoq, kisianni siunissaq eqqarsaatigalugu isumalluarpugut, aappariit Sermitsiaq.AG-mut oqarput.
Angallat ullumikkut ''H.J Rinks''-imik taaguuteqarpoq, nunatsinnilu politiit annaassiuniutaattut sanaajuvoq, ukiullu 30-t sinnerlugit politiit angalataattut ''NakuaK''-mik taaguuteqarluni angalasimavoq. 2003-mi Naalagaaffiup Sinniisoqarfianit iluarsartuunneqarpoq, taannalu Naalagaaffiup sinniisuata angallataatut atorneqarluni.
Angallat 67 fodinik angissuseqartoq ateqaatimisut ateqalersinneqartoq, aappariit tusagassiuutinut nalunaarummi ilisimatitsipput, takornarissanillu angallassinissamut akuersissut 2022-ip tungaanut atuunnerarpaat.
2018-imi angalanerit 14-t
2018-imi angalanernik 14-inik ullunik arfinilinnik sivisussusilinnik angallammi tallimariarluni unnuinertalimmik angalatitsinissat neqeroorutiginissaat pilersaarutaavoq. Takornarissat ilaatigut Tasermiut kangerluat angalaffigissavaat, Uunartoq aamma vikingeqarfiusimasut. Angalaneq siulleq juunip 21-ani pinissaa pilersaarutaavoq - kingulleq septembarip 20-anni.
Angallat marlunnik inunnut sisamanut inissalinnik initaqarpoq, inillu marluk inunnut marlunnut inissallit, taakku 18.900 koruuninik aamma 25.300 koruuninik akeqassapput, nerinerit ilanngullugit.
Angalanermi aqutsisoq
Sarah Woodall ukiuni arfinilinni Visit Greenlandimi sulisimavoq, ''NakuaK''-milu angalanermut aqutsisuussaaq.
- Takornarialillunga sulininni allariarnertut annertuutut isigaara. Visit Greenlandimi nuna tamakkerlugu aallartippunga, maannalu sumiiffimmut nuullunga, tassani takornarissat toqqaannartumik naapittassavakka, Kalaallit Nunaallu pillugu ilisimasakka ukiuni kingullerni pissarsiarisimasakka siammarterlugit, Sarah Woodall oqarpoq.
Angallat Narsarsuarmit aallarlunilu angalareernermi tikittassaaq.