Arsakut marlunngorpat Danmarkimut anngussinnaapput
Arsakut marlunngorpat Danmarkimi timminermik killilersuisinnaapput. Taamaassappalli apeqqutaavoq arsakut qanoq ussitsigissanersut, DMI-mit nalilerneqarpoq
Marlunngorpat pingasunngorpallu Islandimiit arsakut Danmarkip silaannaanut annguteratarsinnaapput, taamaalilluni kingumut Danmarkimiit timmisartornissat killilersorneqalersinnaallutik. Taama Danmarkimi silasiortut naliliipput.
- Siulittuinerit malillugit marlunngorpat pingasunngorpallu aarsakut Danmarkip qulaanut pisinnaapput. Taamaattoqariaannaavoq, oqaatigiuminaapporli qanoq annertutigissanersut, silasiortoq Dan Nelsvall oqarpoq.
Oqarporli ajunngitsuusoq arsakut Islandimiit Europap qeqqanut taama ungasitsigisumut ingerlaarsinnaammata, maannakkullu Danmarkip tungaanut aallarsinnaallutik. Taamaassappat arsakut immaqa ima ussitsiginavianngillat killilersuinermik imaluunniit inerteqqusinermik kinguneqarlutik.
- Qanoq ussitsiginersoq apeqqutaassaaq. Ernummatigaarali sunniuteqariaannaasut, Dan Nelsvall oqarpoq.
Oqarpoq silasiortut ullup ataatsip ingerlanerani erseqqinnerusumik oqaatigisinnaassagaat arsakut Danmarkip silaannaanut anngutissanersut.
Maannakkorpiaq Danmarkip qulaani kitaanit avannaatungaanit anorlerpoq. Naqitsiniissaffik avannamut Skandinaviap qeqertaasaata tungaanut ingerlavoq. Taamaattoqarneratigut kujataaniit anori avannamut saatinneqarpoq, kiannerulerluni silaannarlu kissarnerulerluni.