Artukkerneqartut qinnuteqaataat misissorumavaa
Nutartigaq: Aalisarnermut piniarnermullu naalakkersuisup Finn Karlsenip paasisinnaalluarnerarpaa aalisartut piniartullu ikummatissat akitsornerat pissutigalugu ajornartorsiuteqarmata.
- Maannakkut aningaasanik neriorsuisinnaanngilanga, kisianni qinnuteqaatit takkussinnaasut naalakkersuisut suliariumavaat. Sillimataasivipput maannakkorpiaq imaqanngilaq, nunattalu karsia imaqannginngilaq. Kisianni sutigut arlaatigut tapiissuteqarsinnaalersinnata Inatsisartut Aningaasaqarnermut Ataatsimiitsitaliaata akuersinissaa pisariaqarpoq, Finn Karlsen sermitsiaq.gl-imut oqarpoq.
KNI Polaroililu sapaatiummat uuliap benzinallu ingerlaannartumik atuutilersumik liiterimut 50 oorimik akitsorneqarnissaannik nalunaaruteqareersullu naalakkersuisunut ilaasortaq taamatut nalunaaruteqarpoq. Akinik qaffaanerit aalisartut piniartullu siunissaq pillugu ernumalersippaat.
- Akinik qaffaanerit inuuniutitsinnut eqqorneqartareersumut nutaamik eqquipput. Aalisartut piniartullu nakkaannartariaqalissanersut naluara. Kisianni aningaasakilliornerpaat ilaat nakkaannartussaapput. Naalakkersuisut erngerlutik tapiissuteqanngippata susinnaajunnaavissapput, aalisartut piniartullu kattuffianni KNAPK-mi pisortaq AG-mut oqarpoq.