Asii Kanukokami pisortanngortumut: Suliassaqaqaagut

Kommunit kattuffiata Kakukokap ataasinngornermi nalunaarutigaa nutaamik pisortartaarluni. Hans-Peder Barlach Christensen juunip aallaqaataanit aallartittumik atorfinitsinneqarpoq.

Hans-Peder Barlach Christensen suliffeqarfiup Puisip aallartinneranit akiliisinnaajunnaarluni nalunaaruteqangajalernerata tungaanut atorfeqartup Kanukoka-mut atorfinitsinneqarnera Kommuneqarfik Sermersuumi borgmesterimit IA-meersumit Asii Chemnitz Narupimit oqaaseqarfigineqarpoq:

- Kommunit kattussuunnerisa assigiissaarinerillu qaavatigut nunatsinni kommunit suliassarpassuaqarput. Nuna tamarmi aningaasatigut tatisimaneqarpoq, suliffissaaleqineq annertoqaaq, inuttullu atugarisatigut nunaqarfinni illoqarfinnilu ajornartorsiutit tamarmik nunatsinni qaartartutut qaariaannartutulli ipput. Taamaammat ilisimasatigut pisortatullu suliassatigut peqataanissamut nukiit tamaasa atorluarnissaat pisariaqartinneqarput.

- Naalakkersuisut kommunillu suliassaasa agguataarneqarnerat ukiuni aggersuni pingaarutilipilussuussapput. Aammalu uagut namminneq kommunitsinni missingersuusiatta tatiginissaat, aammalu aningaasaatigut atugassarititaasut pillugit isumaqatigiissutitta isumaqatiginninniutigisartakkattalu tatiginissaat pingaruteqarpoq, Naalakkersuisut isumaqatigiissutinik tamanik, upernaaq manna takusatsitut, sanioqqutaarinerat pinngikkaluarlugu, Asii Chemnitz Narup oqarpoq, isumaqatigiissutit tamaasa sanioqqullugit 20 million koruunit Kommuneqarfik Sermersuumit allanut nuunneqartut innersuussutigalugit.

- Suliassat annertuut amerlasuut qanilluinnartumik siunnerfilimmillu suleqataaffiginissaat qilanaareqaara, aammalu Kanukokap pisortartaassaata kommunit ataqatigiinnerisa nukittorsarnissaannut suleqataanissaa naatsorsuutigalugu, Asii Chemnitz Narup oqarpoq, Martha Labansenillu ukiorpassuarni Kanukokami pisortaasimaneranut qutsavigalugu.