Asiip Enoksen kamaappaa
Ikaarsaariarnermut ataatsimiitsitaliani ilaasortat ajunngitsorsiassaat pillugit Naalakkersuisut siulittaasuata oqaaseqaatai puussaarinerullutillu inatsisinik unioqqutitsinerupput, Kangia-Kitaa Kommunemi ikaarsaariarnermut ataatsimiitsitaliami siulittaasoq Asii Chemnitz Narup isumaqarpoq.
Isornartorsiuineq pivoq, Hans Enoksenip namminersornerusut ataatsimiitsitalianut aningaasaleeqqinnianngitsut oqaatigereeraalu. Aamma naalakkersuisut siulittaasuat isumaqarpoq, ikaarsaariarnermut ataatsimiitsitaliani siulittaasuusut sisamat qaammatinit arfineq-pingasuni 43 millioner kruuninik atuiniarnerat eqqarsariarnartoqartoq.
- Naalakkersuisut siulittaasuata ikaarsaariarnermut ataatsimiitsitaliat ilaasortat qanoq ajungitsorsiassaqartiginissaat namminneq aajallangiisussaanerannik oqarnera inatsisinut naalakkersuisullu namminneq nalunaarutaannut akerliuvoq. Naalakkersuisut siulittaasuata taamatut oqaaseqarnera akuerineqarsinnaananilu tatiginassusianut innarliivoq. Piaarnerpaamik naqqiinissaa utoqqatsissuteqarnissaalu naatsorsuutigaara, Asii Chemnitz Narup oqarpoq.