Aslak Jensen NAPP-mi siulittaasunngorpoq

Aslak Jensen, Sermersuup eqqartuussivianit pisortat suliffeqarfiini sulisumik siorasaarisimasutut sapaatip akunnera una eqqartuunneqartoq, nunattalu eqqartuussivianut suliassanngortitseqqiinermini Inatsisartuni ilaasortatut sulinngiffeqarnissaminik qinnuteqaqqammersoq, NAPP-mi siulittaasunngorpoq.

Sermitsiaq.AG-mut oqaluttuarpoq Nunatta Eqqartuussivianut suliassanngortitseqqiineq peqatigiiffimmi sulinermut sunniuteqaratarsinnaaneranut malittarisassani allassimasoqanngitsoq.

- Malittarisassani allaqqasoqanngilaq eqqartuussivimmi suliassaqartoqartillugu peqatigiiffimmi sulisinnaaneq ajornartoq. Ukiorpassuanngortuni peqatigiiffilerisareerpunga, aamma NAPP-p suliai ilaasortatut ilisimasaqarfigilluarpakka. Siulittaasunngorninni NAPP-mi suliat ingerlareersut ingerlateqqissavagut, Aslak Jensen oqarpoq.

Oqallinnerni ersarilluartut

Aslak Jensen NAPP-p siulersuisuini ukiuni arlalinni ilaasortaasareerpoq aammalu siulittaasup tulliusarsimalluni. Siulittaasutut siulersuisut suliaannik nangitsissalluni piareersimavoq.

- Pingaarnertut suliakkiutigissavarput ilaasortatta Sikukimut akiliisitaasarnerat peertissallugu. Nunatsinni kisiartaalluta taama atuinitsinnut akiliisitaasarpugut, tamannalu immikkoortitsinertut isigaara, oqarpoq.

NAPP oqallinnerni assigiinngitsuni, pingaartumik arfernut tunngatillugu oqallinnerni, ersarilluinnartarsimavoq. NAPP-p ilaasortaasa ersarissumik oqariartuutigaat arfernik aamma niisanik piniagassanik killilersuineq akuerinagu.

Piniagassaqarluarpoq

NAPP Nuup Kangerluani qipoqqaat piniagaaqqusaajunnaarnissaanut aalajangertoqarnerani akerliulluni oqariartuuteqarpoq. Niisanillu pisassanik aalajangersaasoqarnissaa aamma ilaasortanit iluarineqanngilaq.

- Piniartup kialluunniit piniagassat killilersorneqarnerat akuerinngilaa. Uagut ilaasortatsinnit suliakkerneqarpugut tamakku aaqqiiviginissaannut suliniuteqassalluta. Piniartummi takusinnaavaat piniagassaqarluartoq. Piniartut takusinnaalerunikku piniakkat ikiliartulersut, aamma isumaat allanngussaqqaartoq isumaqarpunga, Aslak Jensen oqarpoq.

Aslak Jensenip siulersuisuni sulisimasut qutsavigiumavai, siulersuisunilu ilaasortanngortut suleqatiginissaannut qilanaarluni.