Assartuineq siulleq: Puussiarsuit 500-t igitassanik imaqartut
ESANI-p umiarsuaa ulluni makkunani kujataaniippoq, kommunip illoqarfiini eqqagassanik aallerluni. Eqqakkat puussiarsuarni 500-nit ikinnerunngitsuni katersorneqarsimasut Nuummukaanneqassapput.
ESANI-p umiarsuaa kujataanut eqqagassanik aallerluni tikissimalerpoq. Kommune Kujalleq nittartakkamini taama ilisimatitsivoq.
Kommunip naatsorsuutigaa eqqagassat puussiarsuit 500-nit ikinnerunngitsut Nuummi ikuallaavimmi ikuallanneqartussanngorlugit assartorneqassasut.
- Kujataani illoqarfinninngaanniit poorsuit 500-t missaanniittut arsartuunneqassapput, taamatullu eqqagassanik kujataanut aallerfigitittarnissaq qaammatit tamaasa pisartussatut pilersaarutaavoq, Kommune Kujallermi Teknikkimut avatangiisinullu ingerlatsivimmi Avatangiisilerisoq, Ole Lennerth Poulsen oqarpoq.
Kommuni tamakkerlugu sullinneqassaaq
Kommune Kujalleq ilisimatitsivoq kommunip nunaqarfii aqqaniliusut aamma tikinneqarumaartut, eqqagassat nunaqarfinniit illoqarfinnut assartorneqassallutik. Eqqakkat nunaqarfinneersut assartuinermi tullermi ESANI-mut tunniunneqassapput.E
- Nunaqarfinni eqqakkanik ikuallaasarneq atorneqarunnaarluni poorsuarnut poortuisalernerup kingorna eqqakkat illoqarfinnut qaqugukkut assartuunneqartalernissaat aamma maanna pilersaarusiorneqaleruttorpoq, umiarsuullu tullissaani maanngarnissaannut poorsuit nunaqarfittatsinneersut prammimik aaneqartussat aamma ilaanissaat qulakkeernialeruttorparput, Ole Lennert Poulsen ilisimatitsivoq.