Assiisivik: Katuami ballet-ertut tupinnaannartut
Den Kongelige Ballet-imi inuusuttut piginnaaneqarluartut Nunatta kulturikkut illorsuani Katuami sisamanngornermi unnukkut takutitsipput
Sisamanngornermi unnukkut Københavnimi, Den Kongelige Balletskolemi ilinniartut Nuummi kulturikkut illorsuaq isiginnaartitsiffigaat, nuannerluinnaqqissaartumik ini inunnik ulikkaartoq aliikkusersuillutik.
Ilinniartut inuusuttut tamarmik 12-iniit 16-inut ukiullit Kompagni B-mik ateqartinneqartut isiginnaartitsipput.
Kusanaqaat qangatut balletsimik takutitsineq nipinik nutaaliaanerusunik akullugu isiginnaarianut naleqquttumik eqquipput. Allamik oqartoqarsinnaanngilaq qitittartut inuusuttut takutitaat tupinnaannarput. Takutitsinermi minutsinik 45-nik sivisussuseqartumi qitinnerit kusanartut arlallit takutippaat, soorlu assini takuneqarsinnaasut, taamaattumik atisalersortarfimmi aamma ulapputtoqarsimassaaq.
Balletsi kakkanniartoq
Isiginnaagassiaq isiginnaartitsinertut aaqqissuussaavoq. Isiginnaagassiami kakkanniarpaluuilluni kalaallit oqaasii arlaleriarlutik ilanngunneqartarsimapput, isiginnaarianit assorsuaq nuannarineqartartumik. Taamatuttaaq nuannaarutaatigipput inuusuttut marluk qitiffimmut qaqillutik hiphopimik takutitsimmata.
Kompagni B-mit siunertarineqarpoq balletsip ilisimaneqarnerulernissaanik siammarterinissaq meeqqanut isumassarsiffiusinnaasunik ilinniarfiusinnaasunillu balletsimik misigisaqartitsinerit. Tamannami Kalaallit Nunaannut tikeraarnerannut aamma aallaaviuvoq, sisamanngornermi ullup-qeqqata siorna atuartut 60-it balletsip silarsuaanut tipisiussallutik qaaqquneqarmata. Nuummi meeqqat atuarfianni atuartut ilaasa ulloq atorpaat Kompagni B-nik malinnaallutik, soorlu balletsernermi allornernik tunngaviusunik ilitsersorneqarnermikkut.
Kompagni B 100 procentimik meeqqanik aallussivoq. Qittartut namminneq kompagniip politikkia aamma naleqartitaat aalaajangertarpaat. Taamatullu namminneq isiginnaagassianik pilersitsisarput aamma namminneq angalanissaminnik pilersaarusiortarlutik. Nuummi takutitsinerup kingorna Kompagni B Sisimiuliassapput, sapaammi unnukkut kulturikkut illumi Taseralik, takutitsissallutik ataasinngornermilu meeqqanut inuusuttuaqqanullu sammisaqartitsissallutik.
Nuannaartorinartut
Qallunaat balletsertartut akornanni tusaamasarsuit ilaat tasaasoq koreograf aamma balletmester August Bournonville (1805-1879). Taanna inuk piorsarsimassutsimik aallussisoq naapertorlugu Kompagni B atserneqarpoq. Taassuma balletsernermi nammineqqissaaq periuseq pilersippaa, qitittartuni angutitaq immikkorluinnaq inissisimalluni. Nammineq isiginnaagassiortarsimavoq namminerlu nipilersugassiortarsimalluni nunarsuaq tamaat ilisimaneqaatigisaminik qitittaatsillu taakkua ulloq-manna tikillugu Den Kongelige Ballet-imi takutinneqartarput.
Kompagni B angalasaqaat nunarsuarmi nunat assigiinngitsorpassuit tikissimallugit meeqqanik inuusuttunillu balletsip kulturikkut qanoq isumaqarneranik ilitsersuuttarlugit. Den Kongelige Ballet-imi qitittartut arlallit Kompagni B-mi ilaasortaasimapput.