Assit takukkit: Atlantikup avannaamiut Odensemi juullimut niuffattut

Odensemi Kalaallit Illuutitoqannit juullimut niuffatsitsisarnermik ileqqoq tassani nanginneqaerpoq. Inuppassuillu sapaatip akunnerata naanerani alutornartorpassuarnik takuniaallutik takkuttut uppernarsarpaat ileqqoq taanna nuannarineqarluartoq.

Kalaallit Illuutaanni Nordatlantisk Hus-illu pisortaata Kirsten Mærskip ulluni marlunni juullimut niuffatsitsineq naammagisimaartorujussuuvaa ilaatigullu Sermitsiaq.AG-mut oqarluni:

– Kalaallit Nunaat, Island Savalimmiullu pillugit paasisitsiniaalaartarneq nuanneqaaq. Aamma nunat taakkua pingasut piginnaasaat takutillugit nuanneqaaq. Isumaqarpunga juullimut niuffatsitsinermi piffissap anersaava eqqorneqartoq. Ullumikkut Danmarkimi inuit juullimut allarpassuarnullu atatillugu immikkut ittunik tunissuteqalaarusuttarput.

Tuniniaaviit ussernartorpassuallit

Nordatlantisk Husimi inini quleriinni pingasuni tamani tuniniaaveqarpoq sunik tamanik ussernartorpassuarnik tuniniaavinnik. Nuersakkat, puisip amianik sanaat, julekortit, sanaanernik sanalukkat, atuakkat assillu, Islandimit tunisassiank misileraanerit, kalaallillu nivissat Oensemi Ungdomshuset-imeersut juullimut pinnersaatinik nissiaqqanillu tuniniaapput. Nissiaqqat Sermitsiatoqqanit sananeqarsimasut. Soorunamilu erinarsoqatigiinnik erinartorsoqarlui.

Arfininngornermi aliikkusersuipput erinarsoqatigiit Umiaq, sapaammilu ualikkut Atlantikup avannaani erinarsoqatigiissuit erinarsorput nunat pingasut oqaasii atorlugit.

Naammagisimaarinnippoq

Erik Heilmann siullermeersumik juullimut niuffannermi peqataavoq, naammagisimaarinnilluarporlu.

– Tunisaqartorujussuuvunga. Siullermeersumik nammineq suliakka saqqummersippakka, misigisarlu nuannersorrujussuuvoq, Erik Heilmann Sermitsiaq.AG-mut oqaluttuarpoq.

Erik Heilmannip ilaatigut atorpai tuttut nassui, umimmaat nassui umimmaallu niaquisa qaaavi.

Assit ataani takukkit