pilluarit
Assit takukkit: Atuakkiorngaartup sapiilluni kinguaassiutitigut atoqatigiittarnerit eqqartorpai
Atuakkami ilaatigut arnaqatiminnoortartut marluk, anguteqatiminoortartoq ataaseq, angutinik arnanillu atoqateqartartoq kiisalu transeksueli pillugit inuunermi atugaat atuakkiarineqarpoq
Niviaq Korniliussenip atuakkiaa 'Homo Sapienne' sisamanngormat saqqummerpoq.
Saqqummiunneqarneranut atatillugu persuarsiorpalaartumik katersuuttoqarpoq kulturikkut illorsuarmi Katuami Nuummi sisamanngormat. Atuakkanik saqqummersitsisarfik Milik aqqutigalugu atuagaq saqqummersinneqarpoq.
Atuakkanik saqqummersitsisarfimmit Lene Terkildsen tikilluaqqusivoq. Tassani Niviaq Korneliussen atuakkiornerup silarsuaani ilisimaneqareersoq oqaatigaa, tassami 'San Francisco' allareernikuugamilu, taannalu 'Kalaallit Nunaanni inuusuttut inuuneranni' atuakkami ilaasoq oqaatigalugu.
Atuakkap aallaqqaasiutaanik atuartoqarpoq kiisalu aamma atuakkamit Niviaq nammineerluni atuaalaarluni. Assiliisartup Jørgen Chemnitzip assilisai aamma takutitassiarineqarput.
Suiaaqatiminnik atoqateqartartut
Atuagaq 'Homo Sapienne'-mik qulequtaqarpoq. Atuakkami kalaallit inuusuttut arnaqatiminnoortartut marluk, anguteqatiminoortartoq ataaseq, angutinik arnanillu atoqateqartartoq kiisalu transeksueli pillugit inuunermi atugaat atuakkiarineqarpoq, ilaatigut aamma qujungunnarsinnaasunik imaqarluni.
Atuakkami qitiutinneqarput asanninneq, ikinngutigiinneq ilaqutariinnerlu.
Atuakkap imaa inuusuttorpalaartorujussuuvoq, Facebookimi sms-imilu allaqatigiinnernit ilaatigut imaqarluni. Atuakkap assitai Jørgen Chemnitzimit assilisaapput.
Niviaq Korneliussen 24-nik ukioqarpoq Nanortalimmiuulluni. Aarhusip Universitetiani psykologiimut atuartuuvoq.
Naak Niviaq Korneliussen inuusukkaluaqaluni inooriaatsinut ilisimasaqarluarpoq.
Assit ataani takukkit