Assit takukkit: Tassaarsuaqarnerani Siriusip pigisai malissuarnit amuneqarsimasut
Nunami allanngutsaaliukkami tassaarsuaqartoqareernerani Arktisk Kommando sumiiffimmi pigisanik imaaniilersimasunik katersuisimavoq. Siriusip pigisai imaanit amuneqarsimapput.
Nunami allanngutsaaliukkamiittumi, Dickson Fjordimi sapaatip akunnerata naanerani tassaarsuaqareersorlu, Arktisk Kommando torersaanermit assinik siammartiterivoq.
Arktisk Kommando Siriusimi sulisuusimasumit, maanna takornariartaammi Ocean Albatrosimiittumit, sapaammi 17. september attavigineqarpoq.
- Taassuma ingerlaannarluni maluginiarsinnaasimavaa Ella Ø-mi Siriusip illuutaata eqqaa allanngorsimasoq, Arktisk Kommando facebookimini allappoq.
Tassaarsuaqartoqarnerani inunnik ajoqusertoqanngilaq, Siriusilli pigisai imaanut kuugussaasimapput.
Oqartussat pingasunngornermi ualikkut aarlerisaaruteqarput, sumiiffimmi pisoqaqqissinnaanera sillimaffigeqqullugu. Nalunaarsuinerit takutippaat tassaarsuaqartoqarnerani malissuit 50 miiterisut portutingisut nunamut qaarsimasut, sajuppillannerillu Ritcherip uuttuutaani 3,4 nalunaarsorneqarsimasut.
Torersaaneq naammassisoq
Arktisk Kommando Siriusip illuutaata eqqaani marlunngormalli torersaalerpoq.
Umiarsuaq nakkutilliiartortitaq Knud Rasmussen aamma Sirius-patruljep inuttai torersaanermik suliaqarput, Siriusip atortui imaanit qaqillugit.
Assit takutippaat imaani suliaqarnerit, sumiiffiullu silaannarmit assilineqarnera.
Arktisk Kommando ilisimatitsivoq torersaaneq maanna naammassisimalersoq.