Astrid Fleischer Rex - uummataa meeqqanut tillertuartoq - toqukkut qimaguppoq

Astrid Fleischer Rex 69-inik ukioqarluni toquvoq. Kommuneqarfik Sermersooq nittartakkamini taama allappoq.

Astrid Fleischer Rex ilisarisimannitseqarluartoq nuannarinnitserpassualillu inuunermini isummaminik oqaasinnguinissaminut tunuarsimaaruteqartuunngilaq. Taamaariaramilu isummersuutai inuiaqatigiinni erseqqilluartuupput, Inatsisartuni aammalu Nuuk Kommuniusimasumi kingusinnerusukkullu Kommuneqarfik Sermersuunngornikuusumi.

Politikkimilli aallutaqarnermi saniatigut ilusilersuillaqqissuseqarpoq, taamaammallu aamma nammineq ilusilersukkaminik atisaliortarpoq nalliuttorsiutinik aammalumi ulluinnarsiutinik, nunatsinnilu inuppassuit Astridip atisaliaanik atisaasivimminniittuuteqassaqqooqqaat, tassami naggatissi tikillugu facebook aqqutigalugu atisaliaminik nittarsaassilluartarlunilu tuniniaasarami.

Inuiaqatigiinni meeqqat qanoq atugaqarnerat pillugu sulissutiginnittoq

Kommuneqarfik Sermersooq Astrid Fleischer Rex pillugu imatut allappoq:

Politikeritut meeqqat atugarisaasa pitsanngorsaaffigineqarnissaat pingaartillugu tunniusimaffigalugu sulissutigaa. Kinguaariit tulliuttut pitsaanerusumik atugassaqartinneqarnissaat qamuuna tunniussimaffigigaa sulinermini malunnaatigaa.

Astrid Fleischer Rex Nuup Kommuniani 2005-imi kommunalbestyrelsimut qinigaavoq, taamanikkut Demokraatit nutaatut aallarteqqammernerisa nalaani. 2008-imi aamma ikaarsaariarnermut ataatsimiititaliamut qinigaavoq taamaalillunilu Kommuneqarfik Sermersuumi kommunalbestyrelsimut ilaasortaalerluni.

2011-mi kommunalbestyrelsimit tunuarniarluni aalajangerpoq, Inatsisartuni sulinini ukkatariniarlugu, tassani 2002-miit 2013-ip tungaanut ilaasortaagami.

Qullissarmioq Ilinniartitsisorlu

Astrid Fleischer Rex ilinniartitsisutut ilinniarsimasuuvoq, Vordingborgimilu ilinniartitsisutut 1978-imi soraarummeerpoq. Ilinniartitsisutut ingerlaqqinnermini Maniitsoq tikippaa, tassani ilinniartitsisutut sulilluni, kingornagullu Saattuni atuarfimmi ningiuulluni. Kingusinnerusukkut USK-imi Nuummiittumi ilinniartitsisunngorpoq naggataatigillu Nuussuup Atuarfiani.

Aamaruutissarsiorfiusimasumi Qullissani peroriartorsimavoq, illoqarfiup 1970-ikkunni matuneqarnissaata tungaanut Illoqarfimmi tassani peroriartornermini inuiaqatigiinni sulinissamut piumassuseqalerpoq, kingusinnerusukkut sulinermini tunngaviliisumik.

Astrid Fleischer Rexip qimatarai uini, meeqqani pingasut ernuttanilu pingasut.