Ataasiinnarmik amerlanerussuteqalersut
Henrik Fleischer Siumumit anisitaammat, Naalakkersuisut partii tapersersortaasoq Demokraatit peqatigalugit Inatsisartuni inissanit 31-usunit 16-iinnaat tigummialerpaat
Naalakkersuisut amerlanerussutaat nungulluinnaqqinnaalerpoq. Tassa partiip allaffianit Inatsisartut Siulittaasoqarfiannut nalunaarutigineqarmat Henrik Fleischer Inatsisartuni Siumumut akuujunnaartoq, ilaasortat Naalakkersuisunut tunuliaqutaasut 16-iinnanngorput. Taakkorpiaappullu amerlanerussuteqarnermi atorneqartussat.
Siorna apriilip qaammataani Atassut Naalakkersuisunit tunuarpoq, Kim Kielsenilu taamaalilluni Inatsisartuni partiip ilaasortaatitaanit marlunnit tapersersorteqarunnaarluni. Partii ingerlaannangajak illuatungiliuttunut ilannguppoq, naalakkersuisoqatigiinnullu aamma taakku tapersersortaannut Demokraatinut isornartorsiuinerpaanut ilaalerlutik.
Henrik Fleischerip Siumumut uternissani suli kissaatigingamiuk, qanoq inissisimanissani nalunaarutigerusunngilaa.
Inatsisartunit tunuarniarluni aalajangissagaluarpat, Inatsisartuni issiavia Partii Naleqqamut, sinnerlugit qinigaaffianut tunniunneqassaaq.
Naalakkersuisut Inatsisartuni ilaasortat amerlanerussutigiligaat tassaapput Siumumeersut qulingiluat, Demokraatineersut arfinillit Nunattalu Qitornaaneersoq ataaseq.