Ataataaqataasunut naligiissitsinissaq pilersaarusiorneqalersoq
Anaanaaqataasutulli ataataaqataasunut pisinnaatitaaffitsigut naligiissitsisoqarnissaa isumaliutigineqarpoq.
Meeqqamut ataataaqataasut pineqartillugit, danskit kalaallilluunniit inatsisaanni arnat angutillu naligiissinneqanngillat.
IA-mit folketingimut ilaasortamut, Aaja Chemnitzimut, isumaginninnermut ineqarnermullu ministerip Pernille Rosenkrantz-Theilip akissutaani, tamanna erserpoq.
Maannakkumut periarfissaq
- Eqqartuussivitsigut ataataaqataaneq danskit eqqartuussivianni suli piunngilaq. Angutit aappariit meerartaarusuppata, ataataasup aapparisaa meeravissiartaarnikkuinnaq angajoqqaanngorsinnaavoq, ministeri paasissutissiivoq.
Taamaattorli ministerip ersersippaa, danskit eqqartuussivianut ataataaqataanerup eqqunnissaa isumaliutigineqartoq.
- Tamanna isumannaarneqareerpat, Kalaallit Nunaanni inatsisitigut atuutilernissaa pillugu Namminersorlutik Oqartussat eqqartueqatigineqarumaarput, ministeri akissummini allappoq.