Ataatsimiititaliami ilaasortaq tupigusuttoq: Netfliximi nangeqattaartumik isiginnaarnermi akissarsiaqartinneqarneq

Nunatta karsiata 2022-mut naatsorsuutai Inatsisartuni pingasunngormat oqaluuserineqarput.

Kukkunersiuinermut Ataatsimiititaliami Demokraatinit ilaasortaq, Bjørk Lange Olsen, oqalugiarnermini Tunngaviusumik inatsisissamut isumalioqatigiissitap aningaasanik atuisimaneranut partiip isornartorsiuineranik tusartitsilluni piffissangaatsiarujussuaq atorpaa.

Isumalioqatigiissitami ilaasortamut ataatsimut akissarsiaqartitsinerit "amerlanerujussuunerat", naatsorsuutigisamiillu annertunerujussuarmik akissarsiaqartitsisoqarsimaneranut, kukkunersiuisut nalunaarutaanni nassuiaataat oqaaseqarfigaa.

Deloittep nalunaarusiamini allassimavaa juullip ukiortaallu akornanni sapaatit akunneri tallimat, 7. december 2021-miit 14. januar 2022-mut, taakkunani juulliaqqap ullua ukiortaarlu ilanngullugit, akissarsiaqarnissamik qinnuteqartoqarsimasoq.

Atuakkamik atuarneq Netfliximilu nangeqattaartumik isiginnaarneq

Ullormusiaqarnissamullu qinnuteqaammi tunngavilersuutit Bjørk Lange Olsenip tupigusuutigai:

- Aningaasat sumut atorneqarsimanersut pillugit paasiniaarnermi tunngavilersuutigineqarpoq atuakkanik atuarnermut, ullunilu ataasiakkaani Netfliximi nangeqattaartuliamik Tpkyo Trailimik isiginnaarnermut atorneqarsimasut, Bjørk Lange Olsen oqaluttarfimmiit oqaaseqarpoq.

Kukkunersiuinermut nalunaarusiami isiginnaagassiaq nangeqattaartoq isumalioqatigiissitap suliaanut tunngavissaqarnersoq. Netfliximili isiginnaagassiap nassuiaataani allassimavoq isiginnaagassiaq nangeqattaartoq Sorsunnersuup Aappaata naammassisimanerani japanimiut sorsunnersuup nalaani pinerlussimasut pillugit nunat tamalaat eqqartuussiviani eqqartuussisut aqqanillit sulinerannut tunngasuusoq.

Bjørk Lange Olsen oqaluttarfimmit inerniliivoq:

- Oqartoqarsinnaavoq isumalioqatigiissitaq sipaarniarpallaasimanngitsoq, tamannalu aamma kukkunersiuinermut nalunaarusiortunit inerniliussarineqarpoq.

Politikerip ilanngullugu erseqqissarpaa akisussaaffik annerpaaq Naalakkersuisuniittoq, isumalioqatigiissitap oqallisaaqisup nakkutiginissaanik suliaqartussaammata, Demokraatillu oqaatigaat suliami Naalakkersuisut sakkortuumik uparuarneqartariaqartut. Kukkunersiuinermut ataatsimiititaliami ilaasortat sinnerisa tamanna isumaqatiginngilaat, ataatsimiititaliami amerlanerussuteqartut isumaqarput Naalakkersuisut naammaannartumik uparuarneqartariaqartut.

Nalunaarusiami immikkuualuttut ersigunnaarsillugit titarneqarsimasut

Ataatsimiititaliap uparuaanera Naalakkersuisut pingasunngornermi oqallinnermi isumaqatiginerarpaat, tusaatissatullu tigullugu.

Deloittep kukkunersiuinermut nalunaarusiaa Bjørk Lange Olsenip innersuussutigisaa, nunatta karsiata naatsorsuutaanik Inatsisartut suliaqarnerannut ilanngussatut ilaatinneqarpoq.

Nalunaarusiami immikkuualuttut arlallit allassimaneri tarrisillugit titarneqarsimapput - taakkuussagunarpullu isumalioqatigiissitap ilaasortaanik taaneqartunik ilisarnarunnaarsitsiniarluni titarsisimanerit.

Kukkunersiuisulli oqaaseqaataat atuarneqarsinnaapput, ilaatigullu inerniliussarineqarpoq akissarsiat naatsorsuutigisamit "amerlanerujussuusimasut", innersuussutigineqartorlu "tunngaviusumik inatsisissamut isumalioqatigiissitap ilaasortaanut akissarsiaqartitsinermut malittarisassanik ersarinnerusunik" suliaqartoqarnissaa.

Sermitsiaq.AG-p kukkunersiuisut nalunaarusiaannik allagaatinik takunnissinnaanermut Namminersorlutik Oqartussanut qinnuteqareersimagaluarpoq, itigartinneqarsimallunili.

Tunngaviusumik inatsissamut isumalioqatigiissitap tunngaviusumik inatsisissamut missingersuummik suliaqarnermut 30 mio. kr. missaat atorsimavaat.