Ataatsimiititaliani ilaasortaaffiit agguaanneqarnissaat
Atassutip naalakkersuisooqatigiinnissamut isumaqatigiinniarnerni aninerata kingorna ataatsimiititaliani ilaasortaaffiit agguaanneqarnissaat piareerput.
Qineqqusaarnerup nalaani kiisalu qinersinerup unnuaani Kuupik Kleist, IA-meersoq naalakkersuisunut siulittaasunngortussaq neriorsuivoq naalakkersuisuni pissaaneq agguarneqassasoq. Piviusut maannakkut imaapput naalakkersuisooqatigiittussat Inuit Ataqatigiit, Demokratit aamma Kattusseqatigiit Partiiat, ataatsimiititaliani ilaasortaaffiit tallimaagaangata pingasut inuttalersinnaallugit.
Apeqqutaalerpoq illuatungiliuttunut ataatsimiititaliat arlaanni siulittaasunngortitsisoqassanersoq.
Ilaasortaaffinnik agguaassinermi qassinik ilaasortaqarneq tunngavigineqartarpoq, siullertut pineqartut tassaapput aningaasaqarnermut ataatsimiititaliaq, nunanut allanut sillimaniarnermullu ataatsimiititaliaq aamma kukkunersiuinermut ataatsimiititaliaq.
Ataatsimiititaliat ataavartut pingasut taakku saniatigut inatsisartuusimasut ataatsimiititalianik assigiinngitsunik pilersitsisimapput: Inatsisit atortinneqarnerannut ataatsimiititaliaq kiisalu ataatsimiititaliat allat makkununnga tunngasut, ilaqutariinnermut, kultureqarnermut, akileraartarnermut, aalisarnermut, inuussutissarsiornermut, attaveqaqatigiinnermut, avatangiisinut kiisalu peqqissutsimut.